2020 jylǵy 29 mamyrda Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lázzat Ramazanova halyqaralyq uiymdarmen jáne halyqaralyq qarjy institýttarymen genderlik jobalardy talqylaý boiynsha onlain-kezdesý ótkizdi.
Oǵan Eýropa odaǵy, Dúniejúzilik bank, EQDB, ADB, EQYU, BUU-Áielder, BUUDB, IýNISEF jáne IýNFPA ókilderi qatysty, dep habarlaidy "Ult aqparat".
Onlain-kezdesý barysynda Lázzat Ramazanova halyqaralyq uiymdar men qarjy institýttaryna Ulttyq komissiia janyndaǵy jańartylǵan Saraptamalyq toptyń quramyna kirýdi usyndy.
«Biz Qazaqstanda qatysyp otyrǵan jáne is júzinde genderlik komponentti iske asyratyn halyqaralyq uiymdar men damý institýttarynyń kúsh-jigerin shoǵyrlandyrýǵa niettimiz. Qazirgi ýaqytta Ulttyq komissiia Saraptamalyq topty jańartýǵa kiristi. Osyǵan bailanysty biz sizderdi onyń jumysyna belsendi qatysýǵa shaqyramyz. Qiyn ekonomikalyq jaǵdaida bul tiimdi sharalardy birlesip júzege asyrýdyń biregei múmkindigi», - dedi Lázzat Ramazanova.
Saraptamalyq top negizgi úsh baǵyt boiynsha jumys isteitin bolady: otbasy saiasaty, genderlik saiasat jáne turmystyq zorlyq-zombylyqtyń aldyn alý. Bul rette, júieli sharalar respýblikalyq deńgeide, al jobalyq sharalar – óńirler arasynda úzdik tájiribeni berýdi qamtamasyz ete otyryp, oblystyq deńgeide iske asyrylatyn bolady.
Óz tarapynan kezdesýge qatysýshylar genderlik teńdik, áielder men balalar máselelerin sheshýge baǵyttalǵan bastamashylyq jobalar týraly aitty. Lázzat Ramazanova jaqyn arada halyqaralyq jáne donorlyq uiymdar qatysatyn jobalardyń biryńǵai bazasy qurylatynyn atap ótti.
Sondai-aq, Tóraiym Lázzat Ramazanova BUU Áielderge qatysty kemsitýshilikti joiý jónindegi komitetiniń usynymdaryna negizdelgen Ulttyq komissiianyń josparlaryna nazar aýdardy.
«Eger siz osy baǵyttardaǵy kúsh-jigerimizdi qoldap, josparlarymyzdy osy jyldan bastap jumys baǵdarlamalaryna engizseńiz, barlyq halyqaralyq uiymdarǵa rizashylyǵymyzdy bildiremiz. Biz árqaisysymen ózara is-qimyl jáne ózara tiimdi barynsha qoldaý kórsetý joldaryn talqylaýǵa daiynbyz», - dep atap ótti Lázzat Ramazanova.
