Bilim jáne ǵylym ministri Ashat Aimaǵambetov elimizde biylǵy oqý jylyna qatysty úsh nusqany jariialady, dep habarlaidy QazAqparat.
«Bilim jáne ǵylym ministrliginde eldegi epidemiologiialyq jaǵdaidy eskere otyryp, ázirlegen úsh negizgi nusqasy bar», - dedi Ashat Aimaǵambetov Bilim jáne ǵylym ministrliginiń onlain formattaǵy tilshilermen kezdesýinde.
Ministrdiń aitýynsha birinshi nusqa – qashyqtan oqytý.
«Bul nusqa tańdalǵan jaǵdaida alystaǵy eldimekenderdi eseptemegende qalǵanynyń bári qashyqtan oqytylady», - dedi ol.
Ekinshi nusqa – ishtei jáne qashyqtan oqytý.
«Bul jaǵdaida shekteý bolýy kerek: mektepte mindetti túrde termometriia, sanitaizerler bolýy tiis. Áleýmettik qashyqtyq saqtalyp, sabaqtar qysqartylýy kerek. Iaǵni kabinettik júieler alynýy tiis», - dedi ministr.
Ashat Aimaǵambetov úshinshi nusqa - shtattyq rejimde qatań sanitarlyq shekteý sharalary saqtala sabaqty jalǵastyrý ekenin jetkizdi.
«Iaǵni balalar ishtei oqidy da, qońyraý, synyptardyń tolymdylyǵy, aýysym, kabinettik júielerdi alýdan bastap ashanaǵa barýǵa deiingi shekteý sharalary kúshinde bolady», - dedi ministr.
