«Otbasy bank» AQ basqarma tóraǵasy Lázzat Ibragimova baspana baǵasyna qatysty boljamdaryn aitty, dep habarlaidy QazAqparat.
Ortalyq kommýnikatsiialar qyzmetinde ótken baspasóz máslihatynda tilshiler baspana baǵasy turaqtana ma degen suraq qoidy.
«Ósý qarqyny tómendeidi dep oilaimyn. Bul anyq. Óitkeni zeinetaqy jinaǵyn paidalaný 1 sáýirde aiaqtalady. Qazirdiń ózinde kelip túsken barlyq ótinimder – depozitterdi tolyqtyrýǵa, ipotekany óteýge arnalǵan, al turǵyn úidi tolyǵymen satyp alýǵa ótinimder óte az», - dep jaýap berdi Lázzat Ibragimova.
Bank tóraǵasy demografiialyq jaǵdaidy da eskerý qajettigin, Qazaqstanda bala týý kórsetkishi artyp kele jatqanyn aitty.
«Jyl saiyn 400 000-nan astam bala dúniege keledi jáne 60 000-nan astam jańa neke tirkeledi. Eki myńynshy jyldardyń basynda týǵan balalar ósip keledi. Osy faktorlardyń barlyǵy suranysqa edáýir áser etpek. Qazir naryqtaǵy usynys óte úlken, buryn-sońdy bolmaǵan 15 mln sharshy metr baspana salyp jatyrmyz. Meniń oiymsha, baǵanyń ósý qarqyny tómendeidi. Biraq qazirgi baǵalardyń tómendeýine kelsek, búkil álemde bolyp jatqan infliatsiiany eskere otyryp, mundai boljam jasamas edim», - dep atap ótti L. Ibragimova.
