QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov azyq-túlik baǵasynyń qymbattaý sebepterin túsindirdi, dep habarlaidy QazAqparat.
Onyń aitýynsha, jyl basynan beri azyq-túlik baǵasy 4,8%-ǵa ósken.
«Qymbattaýdyń negizgi sebebi – importtyq ónimderge baǵanyń ósýi bolyp otyr. Bizde birqatar ónim boiynsha importqa táýeldilik bar, mysaly qant importyna – 60%, qaraqumyqqa – 11%, kúnbaǵys maiyna – 22%, taýyq etine – 20%. Osy pozitsiialarda baǵanyń eń joǵary ósýine jol berilgen. Biz óz kezegimizde baǵanyń qymbattaýynyń ekonomikalyq sebepterin kórip otyrmyz jáne jedel sipattaǵy birqatar shara qabyldadyq. Taldaý qorytyndysy boiynsha, naryq qatysýshylaryna baǵanyń tómendetý týraly 48 eskertý jiberildi. Bul eskertýlerdiń shamamen 70%-y erikti túrde oryndaldy jáne baǵalar tómendetildi. Búginde baǵanyń ósý qarqyny 0,6% - dan 0,2% -ǵa deiin tómendedi», - dedi Ahmetov Ortalyq kommýnikatsiialar qyzmetinde ótken baspasóz máslihatynda.
