Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine áskeri qyzmet jáne arnaýly memlekettik organdar qyzmetkerleri men áskeri qyzmetshilerdiń turǵyn úi qatynastary máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy QazAqparat.
Zań jobasynda áskeri qyzmet ótkerýdi jáne arnaýly memlekettik organdar qyzmetkerlerin, áskeri qyzmetshilerdi, sondai-aq olardyń otbasy múshelerin turǵyn úimen qamtamasyz etý tetigin jetildirýmen bailanysty normalar kózdelip otyr.
QR Qorǵanys ministriniń orynbasary Daryn Tuiaqovtyń aitýynsha, osy baǵytta úsh zańǵa túzetý engiziledi. «Turǵyn úi qatynasy týraly» zańda mynalar qarastyrylǵan:
- birinshi - qaitys bolǵan áskeri qyzmetshiniń, arnaýly organ qyzmetkeriniń otbasy múshesine qyzmettik baspanany jekeshelendirý, aqshalai ótemaqy alý, aiyrbastaý quqyǵyn berý;
- ekinshi - qyzmettik turǵyn úidi qaldyq quny boiynsha nemese óteýsiz jekeshelendirý;
- úshinshi – qyzmettik úimen eki ret qamtamasyz etýdi shekteý;
- tórtinshi – «modýldi turǵyn úi» uǵymyn engizý.
«Qarýly kúshter, basqa da ásker men áskeri qurylym úshin «modýldi turǵyn úi» uǵymy alǵash ret engiziledi. Bul - jyldam qajet bolǵan kezde turǵan jerin aýystyrýǵa bolatyn turǵyn úi. Olardy satyp alý qysqa ýaqytta áskerdi turatyn orynmen qamtamasyz etýge, al geosaiasi jaǵdai ózgergende olardy osy úimen birge basqa jerge shyǵynsyz kóshirýge múmkindik beredi», - dedi D. Tuiaqov.
«Áskeri qyzmet jáne áskeri qyzmetshiniń mártebesi týraly» zańda:
- áskeri qyzmetshiniń quqyqtary men mindetterin keńeitý – zań jobasynda áskeri qyzmetshige arnaýly organ qyzmetkerine uqsas quqyq berý, mindetter júkteý usynylady;
- attestattaý kezinde poligrafologiiany júrgizý;
- áskeri qyzmettiń úzdiksiz bolýyn belgileý eskerilgen.
«Zań jobasynda áskeri qyzmetshi qyzmetten shyǵarylǵan kúnnen bastap ony qaitadan qyzmetke alǵanǵa deiin úsh aidan aspasa, osy ýaqytta eńbek qatynasy bolmasa, onyń áskeri qyzmeti úzdiksiz dep tanylady», - dep túsindirdi ol.
