Qazaqstanda áleýmettik jelini qoldanýshylardyń saýattylyǵy men mádenietin arttyrý qajet. Bul pikirdi QR Parlamenti Májilisiniń depýtaty Erlan Sairov alǵa tartty, dep habarlaidy QazAqparat.
«Meniń oiymsha, elimizde aldymen áleýmettik jelide retteý kerek. Jáne halyqtyń ony qoldaný mádenietin kóterý qajet. Múmkin, halyqtyń áleýmettik jelini qoldaný saýattylyǵyn arttyrý úshin tegin kýrs uiymdastyrý kerek shyǵar. Búginde áleýmettik jelini barlyq adam qoldanady. Jáne olardyń jýrnalistikaǵa qatysy bar, sebebi olar jelide otyryp aqparat tarata alady. Árine ár adam áleýmettik jelini qoldanýǵa jáne jelide óz pikiri men azamattyq pozitsiiasyn bildirýge quqyly. Al jelidegi sol jazbanyń zańdylyǵy men rastyǵy, ádeptiligi pen ádilettiligi ol basqa másele. Osy oraida azamattardyń jelini qoldaný saýattylyǵy men mádenietin kóterý kerek», - dedi Erlan Sairov elordada ótip jatqan «Astana Media Week – 2021» media aptalyǵy barysynda.
Halyq qalaýlysynyń aitýynsha, elimizde áleýmettik jelini qoldanýdy júieleý qajet.
«Múmkin áleýmettik jelini qoldanýdyń kodeksin ázirleý kerek shyǵar. Ol kópshilikke túsinikti jáne bilik pen qoǵam úshin tiimdi bolýy tiis», - deidi ol.
