Naýryz-maýsym ailarynda Qazaqstan aýrýhanalarynda koronavirýs pen pnevmoniiadan 150 myń adam emdeldi. Bul týraly «Áleýmettik meditsinalyq saqtandyrý qory» KEAQ Basqarma tóraǵasy Bolat Tókejanov aityp berdi, dep habarlaidy QazAqparat.
«Naýryz-maýsym ailarynda elimizdiń statsionarlarynda 150 myń adam koronavirýs pen pnevmoniiadan emdeldi. Naýryz aiyna qaraǵanda, maýsymda bir kúndik tósek-oryndarmen naýqastardyń qamtylýy – 8 esege, juqpaly aýrýlar aýrýhanasyndaǵy tósek-orynnyń qamtylýy – 23 esege óskenin atap ótken jón. Sondai-aq, provizorlyq statsionarlarda bir kúndik tósek-oryn sany naýryz aiynda 21 myń bolsa, qazir 100 myńnan asty», - dedi spiker Ortalyq kommýnikatsiialar qyzmetinde ótken onlain-brifingte.
Atalǵan qor qazaqstandyqtarǵa meditsinalyq kómek kórsetý sapasyn jaqsartý úshin shilde aiynda meditsinalyq uiymdarǵa arnalǵan tarifterdi arttyrǵan.
«Endi provizorlyq statsionarda árbir tósek-oryn kúni úshin – 22 myń teńgeden astam, táýlik boiǵy statsionarlarda bolǵany úshin – 32 myń teńgeden astam, naýqasty anesteziologiia, reanimatsiia jáne qarqyndy terapiia bólimshesinde emdeýdegi tósek-oryn kúni úshin – 70 myń teńgeden astam qarajat qor tarapynan óteledi. Atalǵan qyzmetterge tarifti kóterý qor jetkizýshileriniń sanyn kóbeitýge, jeke aýrýhanalardy belsendi tartýǵa jáne koronavirýstyq pnevmoniiasy bar naýqastardy emdeýge múmkindik beredi», - dedi qor basshysy.
Buǵan deiin Bolat Tókejanov koronavirýsqa qarsy kúres sharalaryna 56,7 mlrd teńge bólingenin aitty.
Sonymen birge, koronavirýstyq infektsiianyń jeńil deńgeiindegi bir naýqasqa – 292 600 teńge, ortasha deńgeidegi naýqasqa – 446 100 teńge, aýyr naýqasty emdeýge – 1,5 mln teńge tarif bekitilgen.
