© Photo: Esi Grünhagen
Qazaqstanda balabaqsha tárbieshileriniń jalaqysy taǵy kóteriledi, dep habarlaidy "Ult aqparat" Oqý-aǵartý ministrliginiń baspasóz qyzmetine silteme jasap.
Vedomstvo málimetinshe, Memleket basshysynyń tapsyrmasy boiynsha 2020 jyldyń qańtarynan 2023 jyldyń qańtaryna deiin bilim berý qyzmetkerleriniń jalaqysy jyl saiyn 25 paiyzǵa ósken. Al biyl qyrkúiektiń 1-nen bastap taǵy 30 paiyzǵa artady. Osylaisha, 97 myńnan astam balabaqsha tárbieshisiniń jalaqysy 2,5 ese ósedi.
"Memleket basshysy qoldaýymen júzege asyrylatyn pedagogterdiń jalaqysyn jyl saiyn arttyrý oń nátije beredi. Mektepke deiingi bilim berý júiesiniń kadrlyq áleýetin kúsheitý maqsatynda olardy daiarlaý, biliktiligin arttyrý jáne attestattaý júiesin jetildirý, áleýmettik mártebesi men jalaqysyn arttyrý jolymen ministrlik júieli jumys júrgizip jatyr.
Mektepke deiingi, orta, tehnikalyq jáne kásiptik bilim berýdi damytýdyń 2023-2029 jyldarǵa arnalǵan tujyrymdamasy qabyldandy. Ádistemelik kabinetter janynan mektepke deiingi tárbie men oqytý pedagogtaryna ádistemelik kómek kórsetý úshin mobildi toptar quryldy", - dep atap ótti departament direktory Natalia Jumadildaeva.
Ministrlik dereginshe, "Mektepke deiingi tárbie jáne oqytý" baǵyty men mamandyǵy boiynsha kadrlardy daiarlaý 39 JOO men 119 kolledjde júrgiziledi.
"Kolledjder mektepke deiingi uiymdarmen birlesip óńirlik erekshelikterdi eskere otyryp, "Pedagog" kásibi standarty negizinde bilim berý baǵdarlamalaryn ázirleidi jáne oqý baǵdarlamalary men josparlaryn derbes jańartady. Pedkolledjderge qoiylatyn biliktilik talaptary qaita qaraldy. Biyl mektepke deiingi bilim berýdiń 20 myńnan astam pedagogi biliktilikti arttyrý kýrstarynan ótedi" - delingen habarlamada.
