Foto: Sali Sabirov / QR Ulttyq olimpiada komiteti
19 aqpanda ótken Italiianyń Milan qalasyndaǵy qysqy Olimpiada oiyndarynda áielder arasyndaǵy jekelei mánerlep syrǵanaý jarystary aiaqtaldy. Álemniń eń myqty sportshylary ózara baq synasqan saiysta Qazaqstan atynan óner kórsetip júrgen mánerlep syrǵanaýshy Sofia Samodelkina óziniń alǵashqy Olimpiadasynda eki baǵdarlamanyń qorytyndysy boiynsha alǵashqy ondyqqa enip, Qazaqstan sportyn bir saty kóterip tastady. Bul týraly Ult.kz habarlaidy.Jarysta Samodelkinanyń ónerine bútkil zal tánti bolyp, tipti básekelesteriniń ózi oryndarynan turyp qol shapalaqtady.
Videodan skrinshot
Al onyń Olimpiada oiyndaryndaryndaǵy sońǵy qoiylymyna tanymal Pussycat Dolls tobynyń ánshisi Nikol Sherzinger óz ánin tańdaǵany úshin alǵysyn bildirip, instagram paraqshasyna jazba jariialady.
«Qazaqstandyq Sofia Samodelkinaǵa 2026 jylǵy Olimpiadada Sunset Boulevard baǵdarlamasymen óner kórsetkeni úshin raqmet!», – dedi óner iesi.
Buǵan Sofia da yqylas tanytyp, Sherzingerge ádemi mýzykasy úshin rizashylyǵyn bildirdi.
Skrinshot: Nicole Scherzinger/instagram.com
Biografiiasy jáne sporttyq joly
Sofia Samodelkina – mánerlep syrǵanaýdan halyqaralyq deńgeide óner kórsetip júrgen sportshy. Ol 2007 jyly 18 aqpanda Moskva qalasynda dúniege kelip, sporttyq jolyn Resei quramasynda bastady. Jasóspirimder arasynda joǵary nátijeler kórsetip, tehnikalyq kúrdeli sekirýlerimen tanyldy.
2022 jyldan keiin reseilik mánerlep syrǵanaýshylarǵa halyqaralyq jarystarǵa qatysýǵa shekteýler qoiyldy. Sonyń saldarynan kóptegen sportshylar basqa elderdiń atynan óner kórsetý múmkindigin qarastyra bastady. Sol ýaqytta Samodelkina da Qazaqstan azamattyǵyn alyp, el quramasyna ótti.
Otbasy jáne Qazaqstanmen bailanysy
BAQ málimetterine sáikes, onyń anasy qazaq ultynan, al ákesi reseilik. Onyń aǵasy men sińli bar. Sińli fehtovaniiadan Qazaqstan ulttyq quramasynda óner kórsetip júr.
Milan Olimpiada sportshynyń jaqyndary memlekettik týmen túsken fotosy jelide tarady. Otbasynyń barlyq múshesi Qazaqstan týynyń túsindegi hýdi kiip, keýde tusyna tý beinesin japsyryp, qoldaryna elimizdiń týyn ustaǵan.
Foto: Áleýmettik jeliden
Aita keteiik, Sofia Qazaqstan azamattyǵyn 2023 jyldyń jazynda alǵan. 2024 jyly Qazaqstan sport jáne týrizm akademiiasyna oqýǵa túsken.
Anasynyń qazaq bolýy da azamattyq rásimdeýde mańyzdy ról atqardy dep jazady BAQ ókilderi. Sonymen qatar, Qazaqstan atynan óner kórsetý oǵan halyqaralyq týrnirlerge qatysýǵa múmkindik berdi.
Qazaqstan atynan óner kórsetý
Sofianyń ózi jarystarǵa Qazaqstan atynan shyǵyp júrgendikten ózin qazaqstandyq sanaitynyn jáne osy el atynan ary qaratai da óner kórsete beretinin málimdegen.
«Men qazir Qazaqstan atynan ekinshi maýsym qatarynan óner kórsetip kelemin jáne bul meniń elim dep esepteimin – dál qazir maǵan osy Olimpiadada óner kórsetý múmkindigin bergen el. Men oǵan sheksiz alǵysymdy bildiremin», – dedi ol.
Foto: SOFYA SAMODELKINA/instagram.com
Qazaqstan quramasy sapynda ol eresekter arasyndaǵy týrnirlerge qatysyp, el namysyn qorǵap júr.
Qazaqstan atynan óner kórsete bastaǵannan keiin Samodelkina halyqaralyq týrnirlerge qatysty, álem chempionatynda óner kórsetip, 2026 jylǵy Qysqy Olimpiada oiyndaryna joldama alyp, óziniń Olimpiadadaǵy debiýtin oryndady.
Olimpiadadaǵy nátijeleri
Sofia óziniń alǵashqy Olimpiadasynda tuńǵysh ret top-10-ǵa endi jáne jeke rekordyn jańartty, bul onyń mansabynda mańyzdy beles boldy.
«Syrǵanaýyma kóńilim toldy. Meniń tájiribemdegi eń jaqsy syrǵanaý boldy desem qatelespeimin. Barlyq elementterdi tamasha oryndap shyqtym. Meniń jattyqtyrýshym meni maqtady, bul eń mańyzdysy», – dedi ol jýrnalisterge bergen suqbatynda.
Sofia Samodelkina qysqa baǵdarlamasynda 68,47 upai jinap, óziniń jeke rekordin jańartty. Al Erkin baǵdarlamasynda da joǵary deńgeide óner kórsetip, jalpy esepte 207,46 upai jinady.
2026 jylǵy Qysqy Olimpiada oiyndarynda áielder arasyndaǵy jekelei mánerlep syrǵanaýdan jeńiske AQSh-tyq Alisa Liý (226,79 upai) boldy. Kúmis medaldi – japoniialyq Kaori Sakamoto (224,90 upai) jáne Japoniianyń taǵy bir sportshysy – Ami Nakai (219,16 upai) qola medal jeńip aldy.
Tehnikalyq erekshelikteri jáne halyqaralyq rekordtary
Samodelkina — tehnikalyq turǵydan kúrdeli baǵdarlamalarymen, joǵary jyldamdyǵymen jáne emotsiialyq jetkizý sheberligimen tanymal. Sarapshylar ony zamanaýi mánerlep syrǵanaýdaǵy bolashaǵy zor sportshylardyń biri dep ataidy.
Ol halyqaralyq jarystarda tórttik sekirýdi oryndaǵan toǵyzynshy áiel jáne úshtik akseldi oryndaǵan on besinshi sportshy. Ol jattyǵýlarda barlyq tórttik sekirýlerdi oryndaǵan (tórttik akseldi qospaǵanda) Aleksandra Trýsovadan keiingi ekinshi áiel. Sofia jarystarda tórttik lýpty oryndaýǵa alǵashqy áreket jasaǵan áiel bolsa da, sekirý tolyq ainalma bolmaǵandyqtan ratifikatsiialanbady. Halyqaralyq jarystarda ol ratifikatsiialanǵan úshtik akselder, tórttik salhovtar jáne tórttik týlýptardy oryndady.
Sondai-aq, Sofia eresekter arasyndaǵy Gran pri jarystarynda medal jeńip alǵan Qazaqstandyq alǵashqy áiel sportshy.
