Foto: Qazaqmys ERG
Qazaqstan Respýblikasy Ónerkásip jáne qurylys ministrligi Geologiia komiteti tóraǵasynyń mindetin atqarýshy Qanat Erýbaev Ortalyq kommýnikatsiialar qyzmetinde ótken baspasóz konferentsiiasynda Ult.kz tilshisine sirek jáne sirek jer metaldaryn barlaý jumystarynyń qazirgi jaǵdaiy men Qazaqstannyń álemdik naryqtaǵy strategiialyq maqsaty týraly málimdedi.11 ýchaskede barlaý jumystary aiaqtaldy
Komitet ókiliniń aitýynsha, 2024 jyly sirek metaldarǵa qatysty 11 ýchaske boiynsha aýqymdy barlaý jumystary aiaqtalǵan.
Aiaqtalǵan jobalardyń ishinde Keńqudyq ken ornynda kalii, mys jáne molibden anyqtalǵan. Sonymen qatar Rjavaia Sopka, Miroliýbovskii, Býkaia Aqbulaq, Aqtóbe Kvartsevyi ýchaskelerinde volfram men niobii sekildi sirek jer elementteri tabylǵan.
Sondai-aq, Qazaqstandaǵy eń iri nysandardyń biri sanalatyn Qorektikól ýchaskesinde keshendi barlaý jáne iri baǵalaý jumystary júrgizilgen. Bul aýmaqta shikizat qory men lantanoidty top elementteri zerttelip, birqatar ýchaskeler óndiristik sapasynyń joǵary ekenin kórsetken.
"Qazirgi ýaqytta Qorektikól ýchaskesi Taý-Ken Samuryq AQ-na jer qoinaýyn paidalaný quqyǵymen berilgen. Kompaniia barlaý jumystaryn jalǵastyryp jatyr", – dedi Qanat Erýbaev.
Komitet málimetinshe, alǵashqy nátijeler oń dinamika kórsetýde.
Álemdik naryqta – ondyqqa kirý maqsaty
Qazaqstan strategiialyq mańyzdy shikizat qorlary boiynsha álemdik naryqta qandai pozitsiiaǵa ie bolýdy kózdeidi? Tilshimizdiń suraǵyna jaýap bergen Qanat Erýbaevtyń sózinshe, sirek jer metaldaryn óndirý men eksporttaý boiynsha álemde Qytai kósh bastap tur. Odan keiin ózge memleketter ornalasqan.
Qazaqstannyń maqsaty – strategiialyq mańyzdy shikizat qorlary boiynsha álemdik ondyqqa ený.
"Ondyqqa kirý úshin biz kóp kúsh salyp jatyrmyz", – degen Geologiia komiteti tóraǵasynyń mindetin atqarýshy Q. Erýbaev bul baǵyttaǵy negizgi tirek jobalardyń biri – Qorektikól týraly baiandady.
Sonymen qatar, elde 1:50 000 masshtabtaǵy geologiialyq túsirilim jumystarynyń negizi qalanǵan. Bul zertteýler, eń aldymen, sirek jer metaldary bar aýmaqtarda jańa ken oryndaryn anyqtaýǵa múmkindik beredi.
"Jańa ýchaskelerdiń ashylýy Qazaqstannyń sirek jer metaldary qory kólemi boiynsha jahandyq pozitsiiasyn nyǵaityp, óndiristik áleýetin arttyrýǵa yqpal etpek", – dep otyr ol.
Q. Erýbaevtyń sózinshe Qazaqstannyń sirek metaldarynasheteldik investorlar arasynda Japoniia, Amerika, Germaniia siiaqty elder qyzyǵýshylyq tanytyp otyr eken.
Munai men altyn qory qansha jylǵa jetedi?
Baspasóz konferentsiiasynda eldiń negizgi paidaly qazbalarynyń qory týraly da málimet berildi. Komitet deregine sáikes, Qazaqstanda 4 mlrd tonna munai qory bar. Qazirgi óndirý kólemin eskergende, bul shamamen 50 jyldan astam ýaqytqa jetedi.
"Al altynnyń memlekettik balansynda tirkelgen qory 2300 tonnany quraidy. Qazirgi óndiris qarqynymen eseptegende, bul kólem 37 jylǵa jetedi" ", – dedi Erýbaev.
