Foto: t.me/GenPr
Qazaqstannyń ońtústiginde munai ónimderin kontrabandalyq jolmen tasymaldaityn týnnel anyqtaldy, - dep habarlaidy Ult.kz Túrkistan oblysy prokýratýrasynyń baspasóz qyzmetine silteme jasap.
Túrkistan oblysy prokýratýrasynyń bastamasy jáne úilestirýimen Túrkistan oblysy boiynsha Ekonomikalyq tergeý jáne UQK departamentteri, Ózbekstan Respýblikasynyń quqyq qorǵaý organdarynyń yntymaqtastyǵy arqyly qylmystyq toptyń qyzmeti toqtatylyp, munai ónimderin kontrabandalaýǵa arnalǵan týnnel joiyldy.
Atap aitqanda, adamdar toby qazaq-ózbek shekarasynda uzyndyǵy 450 metrlik týnnel salǵan.
"Osy týnnel arqyly kún saiyn kólemi 5-7 tonna janar-jaǵarmai materialdaryn kontrabandalyq jolmen shyǵaryp, zańsyz áreketteri shamamen eki aiǵa sozylǵan. Arnaiy sharalarmen qylmystyq toptyń barlyq múshesi, onyń ishinde Ózbekstan azamattary da belgili boldy", - delingen habarlamada.
Sonymen qatar, kórshi memleketten eksporttalǵan janarmaidyń aqsha aýdarý shemasy anyqtaldy.
"Transulttyq qylmystyq toptyń músheleri Qazaqstan aýmaǵynda da, Ózbekstan aýmaǵynda da ustaldy".
Qazirgi ýaqytta sotaldy tergep-tekserý júrgizilip jatyr.
