Foto: Aqorda
Qasym-Jomart Toqaev pen Aleksandr Výchich resmi delegatsiialar qatysýymen keńeitilgen quramda kelissóz ótkizdi. Kezdesý Qazaqstan men Serbiia arasyndaǵy diplomatiialyq qatynastardyń 30 jyldyǵy qarsańynda ótti, dep habarlaidy Ult.kz.
Memleket basshysy Serbiiany Eýropadaǵy mańyzdy strategiialyq seriktes dep atap, saýda-ekonomikalyq, investitsiialyq jáne mádeni-gýmanitarlyq bailanystardy nyǵaitýǵa nietti ekenin jetkizdi. Qazirgi tańda Qazaqstanda 60-tan astam serbiialyq kompaniia jumys isteidi. Taraptar úkimetaralyq komissiia men Iskerlik keńes aiasyndaǵy yntymaqtastyqty joǵary baǵalady.
Kelissózder barysynda saýda jáne investitsiia, kólik-logistika, aýyl sharýashylyǵy, asa mańyzdy mineraldar, tsifrlandyrý, jasandy intellekt, qurylys jáne týrizm salalaryndaǵy ózara is-qimyl máseleleri talqylandy. Serbiia tarapy qorǵanys ónerkásibi, derekterdi óńdeý ortalyqtary jáne qurylys baǵytynda birlesken jobalardy damytýǵa qyzyǵýshylyq bildirdi.
Kezdesý qorytyndysy boiynsha Qasym-Jomart Toqaev Aleksandr Výchichti Qazaqstannyń eń joǵary memlekettik nagradasy – «Altyn Qyran» ordenimen marapattady. Serbiia Prezidenti bul marapatty eki el arasyndaǵy dostyq pen seriktestiktiń belgisi retinde qabyl alǵanyn aitty.
