Foto: Aqorda
Qazaqstan men Ózbekstan prezidentteri Buharanyń tarihi oryndaryn aralap kórdi, dep habarlaidy Ult.kz Aqordanyń baspasóz qyzmetine silteme jasap.
Qasym-Jomart Toqaev pen Shavkat Mirziioev IV-III ǵasyrlarda boi kótergen Ark qamalyn tamashalady. Kóne nysan san ret qiraǵanymen qaita qalpyna keltirilgen. Qazirgi ýaqytta bekinis aýmaǵynda Buhara memlekettik mýzei-qoryǵy ornalasqan.
Budan keiin memleketter basshylary Buharadaǵy tanymal oryndardyń biri «Liabi-haýz» keshenine bardy. Munda XVII ǵasyrda salynǵan Nádir Diýan-Begi medresesi men hanakasy, XVI ǵasyrda irgetasy qalanǵan Kókiltash medresesi sekildi áigili sáýlet eskertkishterin kóre alasyz.
Qazaqstan men Ózbekstan kóshbasshylary XII-XVI ǵasyrlarda salynǵan Kalian munarasy men meshiti, Miri Arab medresesi sekildi úsh ǵimarattan turatyn «Poi-Kalian» tarihi kesheninde boldy.
Buhara ǵasyrlar boiy Ortalyq Aziiadaǵy negizgi rýhani ilim ortalyqtarynyń biri bolǵany belgili.
Jergilikti medreselerde qazaqtyń Máshhúr Júsip Kópeiuly, Nurjan Naýshabaev, Shortanbai Qanaiuly jáne basqa da kórnekti qairatkerleri bilim nárimen sýsyndaǵan. Olardyń esimderi eki el tarihyna ortaq.
Budan bólek, memleketter basshylaryna Máshhúr Júsip Kópeiulynyń mýzei-qujyrasy tanystyryldy. Prezidentter Buharada oqyǵan qazaq ziialylary týraly kórmeni aralap kórdi.
