Qazaqstan Respýblikasy Indýstriia jáne infraqurylymdyq damý ministri Beibit Atamqulov Ázerbaijan Respýblikasynyń Kólik, bailanys jáne joǵary tehnologiialar ministri Ramin Namig ogly Gýlýzademen telefon arqyly sóilesti, dep habarlaidy "Ult aqparat" vedomstvonyń baspasóz qyzmetine silteme jasap.
Taraptar kólik tasymaly, júk tranziti, áýe qatynasy siiaqty salalardaǵy ekijaqty yntymaqtastyqtyń qazirgi jaǵdaiy týraly aqparat almasty. Koronavirýs pandemiiasynyń taralýyna qarsy engizilgen ýaqytsha shekteý sharalaryna qaramastan temirjol jáne avtomobil kóligimen júk tasymaly kólemi artqan.
Ótken jyly Qazaqstan men Ázerbaijan arasynda avtokólikpen júk tasymaldaý kólemi 22 myń tonnany qurady. Qazaqstan temir jolymen júk tranzitiniń kólemi 38,66 myń tonnany qurap, 32% artty.. Byltyr sáýir aiynda Aqtaý-Baký fiderlik jelisiniń ashylýy arqasynda konteinerlik tasymal kólemi 14,7 myń JFB-dan 24,8 myń JFB-ǵa deiin ósti.
Koronavirýstyq infektsiianyń taralýyna jol bermeý maqsatynda búgingi tańda Aqtaý jáne Quryq teńiz porttary arqyly jolaýshylar tasymalyna ýaqytsha tyiym salynǵanyn aitý kerek. Biraq, onyń Otanǵa oralatyn Qazaqstan azamattaryna qatysy joq. Al júk tasymaly shtattyq rejimde oryndalýda.
Biylǵy 6 aida tasymal kólemin 1 mln tonnaǵa deiin jetkizý josparlanyp otyr. Bul ótken jyldyń tiisti kezeńimen salystyrǵanda 17% kóp.
Sondai-aq taraptar epidemiologiialyq jaǵdaiǵa qarai eki el arasyndaǵy áýe qatynasyn 1 tamyzdan qaita bastaý týraly máseleni qarastyrýǵa kelisti. Qazirgi kelisimge sáikes ár tarapqa aptasyna 16 jolaýshy jáne júk reisin oryndaýǵa ruqsat etilgen.
Eske sala keteiik, koronavirýs pandemiiasyna bailanysty shekteý sharalary engizilgenge deiin qazaqstandyq áýe kompaniialary («Eir Astana», «SCAT») aptasyna 13 reis jasap keldi.
Al Ázerbaijannyń áýe kompaniialary («AZAL», «Silk Way West») aptasyna 5 reis oryndaityn.
