Foto: ashyq derekkóz
2025 jylǵy 1 qyrkúiekten bastap Qazaqstannyń barlyq mektepteri men kolledjderinde balalardyń emotsionaldyq ál-aýqatyn qamtamasyz etýge baǵyttalǵan «DOSBOLLiKe» antibýllingtik baǵdarlamasy engiziledi. Bul týraly búgin Ortalyq kommýnikatsiialar qyzmetinde ótken brifingte sala ókilderi málimdedi, dep habarlaidy Ult.kz.
Qazirgi ýaqytta baǵdarlama elimizdiń 9 óńirinde pilottyq rejimde synalýda. Oǵan 70 myńǵa jýyq oqýshy men 5 myńnan astam pedagog qatysýda.
«Bul bastama oqýshylardyń daý-janjaldarǵa konstrýktivti túrde jaýap berý daǵdylaryn qalyptastyrýǵa, áleýmettik-emotsionaldyq qabiletterin damytýǵa, tulǵaaralyq jáne toparalyq qarym-qatynastardy ońtailandyrýǵa, sondai-aq balalardyń jalpy psihologiialyq ál-aýqatyn arttyrýǵa baǵyttalǵan. Árbir balanyń ózin qaýipsiz sezinetin jáne tolyqqandy damityn ortada bilim alýyna jaǵdai jasaý – asa mańyzdy qadam», – dep atap ótti QR Oqý-aǵartý vitse-ministri Edil Ospan.
Baǵdarlama pilottyq joba retinde júzege asyrylyp jatqan óńirlerde barlyq qatysýshylarǵa arnalǵan oqytý kýrstary men praktikalyq sharalar uiymdastyrylýda. Olar býllingtiń aldyn alý, qaqtyǵys jaǵdailarynyń sebepteri men faktorlaryn anyqtaý, sondai-aq olardy sheshý joldaryn túsindirýge baǵyttalǵan.
Sonymen qatar oqýshylar men olardyń ata-analaryna arnalǵan is-sharalar ótkizý kózdelgen, onda «DOSBOLLiKe» baǵdarlamasynyń maqsaty men iske asyrý ádisteri túsindiriledi.
