2025 jylǵa deiin el aýmaǵynda 2 mlrd tal egý josparlanǵan. Ekologiia, geologiia jáne tabiǵi resýrstar vitse-ministri Áliia Shalabekovanyń aitýynsha, bul iske biýdjetten jalpy jiyny 82 mlrd teńge qarastyrylyp otyr. dep habarlaidy QazAqparat.
Bul týraly ol ortalyq kommýnikatsiialar qyzmetinde ótken brifingide aitty.
«Keshendi jospar aiasynda oblystyq ákimdikterdiń, erekshe qorǵalatyn tabiǵi aýmaqtardyń, orman resýrsyn paidalanýshylardyń, halyqaralyq donorlardyń, tabiǵat paidalanýshylardyń jáne ózge de bastamashy toptardyń kúshimen orman egý josparlanyp otyr. Orman egý sharasy jáne onyń kólemi oblystar boiynsha pysyqtaldy. Ol úshin ǵylymi negizdeme usynymdar men salalyq talaptar bekitildi», - dedi vitse-ministr.
Vedomstvo ókiliniń aitýynsha, biyl jyl sońyna deiin jańadan egilgen taldar sany 60 mln bolýy kerek. 2025 jylǵa deiin osy qarqyn údep otyrady.
«Biyl kóktemde el boiynsha 21 600 gektar alańǵa 81 mln 510 myń túp tal egildi. Kúzde 48 mln 200 myń tal egilmek. Egilgen taldar sany jyl saiyn ósip otyratyn bolady. Kelesi jyly 244 mln, 2023 jyly 411 mln, 2024 jyly 573 mln jáne 2025 jyly 643 mln tal egiledi. Kóbinese sekseýil, qaraǵai, úieńki, shegirshin, qaiyń jáne taǵy basqa aǵash túrlerin otyrǵyzý josparlanǵan», - deidi Áliia Shalabekova.
Ministrdiń orynbasary atalmysh maqsatqa bólinetin qarajattyń qai kózderden alynatynyn da atady.
«2 mlrd aǵashtyń 1,5 mlrd danasy oblystyq ákimdikterdiń úlesine keledi. Orman qoryn paidalanýshylar men halyqaralyq donorlarǵa shamamen 200 mln dana jáne Orman sharýashylyǵy komitetine baǵynyshty organdarǵa 300 mln tal egý qajet. Jobany qarjylandyrý respýblikalyq biýdjet esebinen de, jergilikti biýdjet esebinen de iske asady. 5 jyl ishinde respýblikalyq biýdjetten 22 mlrd teńge, jergilikti biýdjetten 60 mlrd teńge jumsalady. Qarajat tiisti tehnika men qurylǵylar satyp alýǵa kerek. Tapsyrmany oryndaý úshin traktorlar, tal egý mashinalary, topyraq qopsytqysh qurylǵylar alynady. Eldegi tálimbaqtardyń aýdany keńeitiledi», - dedi vitse-ministr.
Onyń aitýynsha, 2 mlrd aǵashtyń 300 mln danasyn tuqym sebý arqyly, 1,7 mlrd danasy kóshet túrinde egý josparlanyp otyr. Biyldyń ózinde jergilikti biýdjetterden 6 mlrd teńge, respýblikalyq biýdjetten 5,5 mlrd teńge bólingen.
