Araldyń Ózbekstanǵa qarasty qańsyǵan aýmaǵynda 1,2 mln gektar alqapqa sekseýil egilip, jersindirilgen. Ekologiia, geologiia jáne tabiǵi resýrstar vitse-ministri Áliia Shalabekova osy tájiribeni otandyq mamandar zerttep jatqanyn aitady, dep habarlaidy QazAqparat.
«Shyn máninde, bul keshendi másele jáne tek bizde ǵana qalyptasqan problema emes. Ótken aptada bizdiń delegatsiia Ózbekstandaǵy sekseýil egý tájiribesimen tanysyp qaitty. 1 mln 200 gektar jerge egilgen sekseýil tamyr alyp, jersinip ketken. Keibir eldi mekenderde ótip jatqan bir rettik aktsiialar jaqsy nátije berýi úshin biz de osyndai tájiribeni qabyldaýymyz kerek. Shańdy quiyndardyń zardabynan qutylý úshin jappai sekseýil otyrǵyzý qajet. Qazir bizdiń ministrlikte bul máseleni júieli túrde sheshý úshin baǵdarlama ázirlenip jatyr. Sekseýil egýdiń birneshe tásilin qoldanbaqshymyz. Áýeden tuqym shashý, mehanikalyq tásilmen egý qatar qoldanylady», - dedi vitse-ministr.
Vedomstvo ókili sekseýildi qorǵaý máselesine de toqtaldy.
«Qazir Májiliste «Ósimdikter álemi týraly» zań jobasy qaralyp jatyr. Sol zań qabyldansa, ósimdikterdi qorǵaý salasy retke keler edi. Zań búkil qoǵamnyń ósimdikterdi ósirý jónindegi jaýapkershiligin, mindeti men quqyqtaryn aiqyndaidy. Biz qazir osy baǵytta jumys istep jatyrmyz», - dedi Áliia Shalabekova.
Orman sharýashylyǵy jáne janýarlar dúniesi komiteti tóraǵasynyń mindetin atqarýshy Erlan Qutpanbaevtyń aitýynsha, vitse-ministr aityp otyrǵan joba 2030 jylǵa deiin iske asyrylady.
«Araldyń qańsyǵan tabanynda sekseýil egý 1980 jyldan bastap júrgizilip keledi. Búginge deiin ondaǵy ormandy alqaptyń jalpy kólemi 337 myń gektardan asty. Kóktemde arnaiy ekspeditsiia uiymdastyryldy. Ekspeditsiia músheleri qańsyǵan alqaptardyń birazyn aralap ótti. Qazirgi ýaqytta izdestirý jumystary júrgizilip jatyr. Ormanǵa jaramdy jerlerdiń bári izdestirý jumystarynan keiin anyqtalady. 2030 jylǵa deiin 1 mln gektardan astam jerge sekseýil egý josparlanǵan», - dedi ol.
