Foto: t.me/kazakhmys_news
Jezqazǵanda korporatsiianyń Basqarma basshysy Rýslan Óskenáliniń tóraǵalyǵymen kompaniia basshylyǵy jáne kásiporyndardaǵy eńbek ujymynyń qatysýymen jumys jinalysy ótti. Kezdesý barysynda Qazaqmystyń 2026 jylǵa arnalǵan negizgi damý baǵyttary aiqyndaldy. Ár baǵyt boiynsha naqty aqparatty Basqarma tóraǵasynyń tiisti bloktarǵa jaýapty orynbasarlary baiandady.
Kompaniianyń basym baǵyty sanalatyn óndiristik qaýipsizdik mádenietin damytý kezdesýdiń basty taqyryby boldy. Jumyskerlerge adamnyń ómiri men densaýlyǵyna, sondai-aq jabdyqqa qaýip tóndiretin jaǵdai anyqtalǵan kezde, eńbekti qorǵaý talaptary buzylǵanda nemese eńbek jaǵdaiynyń qaýipsizdigi qamtamasyz etilmegeni anyqtalǵanda jumysty toqtatý quqy bar ekeni eskertildi.
2026 jylǵa arnalǵan óndiristik qaýipsizdikti damytýdyń negizgi baǵyttary belgilendi: qaýipsizdikke investitsiia salý, arnaiy kiimniń biryńǵai standartyn engizý, kommýnikatsiialyq jáne yntalandyrý baǵdarlamalaryn damytý, oqytýdy jetildirý, meditsinalyq tekserýdi avtomattandyrý jáne rásimderdi standarttaý.
Foto: t.me/kazakhmys_news
Foto: t.me/kazakhmys_news
Mineraldyq-shikizattyq bazany damytý men geologiialyq barlaýǵa erekshe nazar aýdaryldy. 2025 jyly Micromine kompaniiasy Micromine O&B baǵdarlamalyq jasaqtamasyn qoldana otyryp, bes kenishte geologiialyq-marksheiderlik jumysqa aýdit júrgizdi. Qorytyndysynda Micromine Advance oqytý baǵdarlamasyn engizý, litologiialyq jáne gidrologiialyq model ázirleý, Geobank júiesimen jumys isteýge oqytý jáne tsifrlyq quraldardy odan ári damytý týraly sheshim qabyldandy.
Sondai-aq arnaiy tehnikany ár 3-5 jyl saiyn josparly túrde aýystyrý tsiklyn engizý, jumys ornynyń korporativtik standartyn ázirleý, shyǵynnyń tiimdiligin arttyrý maqsatynda tehnika parkin birizdendirý, sondai-aq jabdyqtardy jetkizý jáne olarǵa servistik qyzmet kórsetý boiynsha strategiialyq seriktesterdi aiqyndaý jóninde sheshim qabyldandy.
Geologiialyq jáne marksheiderlik bólimsheler úshin eskirgen ǵimarattardyń ornyna jańa ákimshilik-turmystyq keshen salý máselesi talqylandy.
Jezqazǵan qalasynda ornalasqan Ortalyq Aziiadaǵy alǵashqy Geologiialyq klasterdiń jumysyna erekshe nazar aýdaryldy. Jalpy aýdany 14 myń sharshy metrden asatyn keshen 200 jumys ornyna arnalǵan. Onyń qurylymyna oqý ortalyǵy, kitaphana, jataqhana, ALS analitikalyq zerthanasy, Colorado School of Mines ýniversitetimen birlesip ashylǵan Qazaqstandaǵy alǵashqy geofizikalyq zerthana, murajai, keńse ǵimaraty, jóndeý-mehanikalyq tsehy jáne kólemi 200 myń qýma metrden asatyn kern saqtaý qoimasy kiredi.
2026 jylǵa arnalǵan óndiristik jospar 31,6 mln tonna ken óndirýdi, shamamen 33 mln tonna kennen mys kontsentratyn óńdep, shyǵarýdy kózdeidi.
Jezqazǵan, Qaraǵandy jáne Balqash óńirleriniń kenishterinde, sondai-aq Shatyrkól-Jaisań klasteri aýmaǵynda damý jobalaryn iske asyrý josparlanǵan. Atalǵan jobalar óndirý kólemin turaqtandyrýǵa, geomehanikalyq ornyqtylyqty arttyrýǵa jáne ken oryndaryn paidalaný merzimin 2032-2052 jyldarǵa deiin uzartýǵa baǵyttalǵan.
Ekologiia máselesi korporatsiia úshin strategiialyq baǵyt bolyp qala beredi. Ekologiialyq tiimdilikti arttyrý baǵdarlamasyn iske asyrý aiasynda JMZ-da 34 is-shara, al BMZ-da aspiratsiialyq jáne gaz tazalaý júielerin jańǵyrtý boiynsha 28 is-shara ótkizý kózdelgen. Bul sharalar shyǵaryndylardy kezeń-kezeńimen eń úzdik qoljetimdi tehnologiialar normativine sáikestendirýge múmkindik beredi.
