Foto: kazakhmys
Qazaqmys korporatsiiasy «Jomart» kenishindegi óndiristik jáne infraqurylymdyq jobalardy iske asyrý aiasynda prombazany damytýǵa baǵyttalǵan investitsiia kólemin ulǵaitty. Bólingen qarajat jeldetý júielerin jańǵyrtýǵa, qaýipsizdik quraldaryn engizýge jáne óndiristik nysandardy jańartýǵa jumsalýda. Atap aitqanda, kenishti damytýǵa salynǵan investitsiianyń jalpy kólemi 2,7 mlrd teńgeden asyp, negizgi bóligi jeldetý infraqurylymyn keńeitý men jańǵyrtýǵa baǵyttalǵan, dep habarlaidy Ult.kz «Qazaqmys korporatsiiasy» baspasóz qyzmetine silteme jasap.
«Qazaqmys korporatsiiasy» JShS Basqarma tóraǵasynyń óndiris jónindegi orynbasary Saiat Bakirov jumys saparymen «Jomart» kenishine bardy.
Sapar barysynda óndiristik jáne infraqurylymdyq máseleler qaralyp, taý-ken-kapitaldyq, úńgileý jáne ken óndirý jumystarynyń barysy talqylandy.
Foto: kazakhmys
Kenishti damytýǵa salynǵan investitsiianyń jalpy kólemi 2,7 mlrd teńgeden asady. Qarajat №3 jeldetý oqpanyn tereńdetýge jumsalady. Joba aiasynda oqpandy arqaýlaý, sondai-aq negizgi jeldetý qondyrǵysyn ornatyp, paidalanýǵa berý qarastyrylǵan.
№1 jáne №2 negizgi jeldetý qondyrǵylaryna kúrdeli jóndeý júrgizilip, olar jobalyq qýatqa shyǵaryldy. Bul shahtaǵa qosymsha 200 tekshe metrge deiin taza aýa jetkizýge múmkindik beredi.
Jeldetýdi jaqsartý maqsatynda diametri 2,5 metr bolatyn eki jeldetý shýrfy qazylyp, 156 metr tereńdikke aýa berý qamtamasyz etildi. Batys jáne shyǵys qaptaldarda diametri 4,5 metr bolatyn taǵy eki shýrf qazý josparlanýda. Olar 600 metrge deiingi tereńdikke aýa jetkizýdi qamtamasyz etedi.
Sonymen qatar «SoiýzGeoMeh» JShS-men mamandardy oqytý jáne kompaniia kenishterine geomehanika boiynsha zamanaýi standart engizýdi kózdeitin yntymaqtastyq máselesi qarastyrylýda.
