Foto: «Qazaqmys» korporatsiiasy
«Qazaqmys korporatsiiasy» JShS Basqarma tóraǵasy Rýslan Óskenáli Jambyl oblysyndaǵy Shatyrkól-Jaisań klasteriniń kásiporyndaryna jumys saparymen bardy. Sapar aiasynda kompaniia basshysy «Jaisań» jáne «Shatyrkól» kenishteriniń jumysymen tanysyp, Shatyrkól baiytý fabrikasyn aralady. Sonymen qatar vahtalyq kenttegi jumysshylardyń turmys jaǵdaiymen tanysyp, tamaqtandyrýdyń uiymdastyrylýyn tekserdi.
Búginde Shatyrkól-Jaisań klasterine «Shatyrkól» kenishi jáne Shatyrkól baiytý fabrikasy kiredi. Ol óńir ekonomikasyna eleýli úles qosyp otyrǵan kompaniianyń asa mańyzdy óndiristik nysandarynyń biri bolyp tabylady.
Sapar barysynda Shatyrkól baiytý fabrikasyn odan ári paidalaný máselesine erekshe nazar aýdaryldy. Merdiger uiymmen jasalǵan kelisimsharttyq mindettemelerdiń aiaqtalýyna bailanysty kásiporyndy odan ári basqarý tikelei «Qazaqmys» korporatsiiasy arqyly júzege asyrylady.
Kompaniia fabrikanyń jabdyqtaryn paidalaný jáne óndiristik qyzmetin qamtamasyz etýge tartylǵan qyzmetkerlerdi jumysqa qabyldaýǵa daiyn ekenin rastady.
Jumysqa qabyldaý kezinde qyzmetkerlerdiń jaǵdaiy burynǵydan tómendemeidi. Jalaqy, ótemaqy jáne yntalandyrý tólemderi, vahtalyq jumys tártibi, turmystyq jaǵdai jáne tamaqtaný sharty, sondai-aq Qazaqstan Respýblikasynyń eńbek zańnamasynda jáne eńbek shartynda kózdelgen barlyq kepildikter saqtalady.
«Búginde Shatyrkól fabrikasynda eńbek etip júrgen kásibi ujymdy saqtaý biz úshin asa mańyzdy. Bul mamandar kásiporynnyń turaqty jumys isteýine qajetti tájiribe men bilimge ie. Biz jumyskerlerdiń jalaqy deńgeiin, áleýmettik kepildikterdi, vahtalyq kenttegi turmys jaǵdaiyn jáne jumys tártibin saqtai otyryp, shtatqa qabyldaýǵa daiynbyz. Bizdiń mindetimiz – óndiristiń úzdiksiz jumysyn qamtamasyz etý, kadrlyq áleýetti saqtaý jáne Shatyrkól-Jaisań klasteriniń turaqty damýyn jalǵastyrý», – dep atap ótti «Qazaqmys korporatsiiasy» JShS Basqarma tóraǵasy Rýslan Óskenáli.
Qyzmetkerlerdi jumysqa qabyldaý Qazaqstan Respýblikasy eńbek zańnamasynyń talabyna sáikes jeke tártippen júzege asyrylady.
Bul sheshim óndiristik úderistiń úzdiksizdigin qamtamasyz etýge, kadrlyq áleýetti saqtaýǵa jáne kásiporyndaǵy áleýmettik turaqtylyqty qoldaýǵa baǵyttalǵan. Sonymen qatar ol Shatyrkól-Jaisań klasteriniń óndiristik yqpaldastyǵyn kúsheitýge, ónerkásiptik qaýipsizdiktiń biryńǵai standartyn qamtamasyz etýge jáne tehnologiialyq úderisti basqarý tiimdiligin arttyrýǵa múmkindik beredi.
