Foto: orda.kz
"Qazaqmys" kompaniiasy Jomart kenishinde qaza tapqan kenshilerdiń otbasyna qandai kómek kórsetiletinin jariialady, dep habarlaidy Ult.kz.
Kompaniia máiitterdi úiine jetkizý shyǵynyn óz moinyna aldy. Jaqyn týystarynyń ótinishi boiynsha úsh kenshiniń denesi Túrkistan, Qaraǵandy oblystaryna, qalǵandary Jezqazǵan, Sátbaev qalalaryna jetkizildi.
Taiaýda otbasy múshelerimen kezdesý uiymdastyrylyp, jumyspen qamtý jáne turǵyn úi jaǵdaiyn jaqsartý máseleleri talqylanady.
Saqtandyrý sharttary boiynsha tólemder
"KM Life" saqtandyrý kompaniiasy qaza tapqan ár kenshiniń asyraýynda bala bolǵanyn eskerip, olardyń otbasyna asyraýshysynan aiyrylýyna bailanysty saqtandyrý tólemin taǵaiyndaidy.
"Saqtandyrý tóleminiń mólsheri qaitqan adamnyń asyraýyndaǵy adamdardyń sanyna jáne onyń ortasha ailyq jalaqysyna bailanysty bolady. Bul tólemder balalar 18 jasqa tolǵanǵa deiin ai saiyn tólenedi, eger olar joǵary oqý ornynyń kúndizgi bóliminde oqysa, 23 jasqa deiin tólenedi", - dep jazylǵan habarlamada.
Sondai-aq 14 jasqa deiingi balalarǵa kútim jasaityn, jumys istemeitin analarǵa da tólem taǵaiyndalady.
Qaitys bolǵan asyraýshynyń asyraýyndaǵy adamdarǵa tólenetin saqtandyrý tóleminiń kólemi jyl saiyn boljamdy infliatsiia deńgeiine para-par mólsherde ulǵaiyp otyrady.
Budan bólek qaza tapqan kenshilerdiń otbasy "KM Life" saqtandyrý kompaniiasynan 100 AEK mólsherinde jerleý rásimine arnalǵan birjolǵy tólem alýǵa quqyly.
Ujymdyq shart aiasyndaǵy mindettemeler
Ujymdyq shartqa sáikes, qaza tapqandardyń otbasyna jerleý rásimin atqarý úshin 550 AEK nemese 2,2 mln teńge mólsherinde birjolǵy tólem aýdaryldy. Aldaǵy ýaqytta olarǵa jyldyq jalaqynyń 10 eselengen mólsheri tólenedi, onyń somasy 84 mln teńgeden 141 mln teńgege deiin jetedi.
Sondai-aq asyraýshysynan aiyrylý jaǵdaiyna ai saiynǵy tólemder, balalardyń oqý aqysyn tóleý, sondai-aq otbasy músheleriniń ótinishi boiynsha basqa da kómek túrleri qarastyrylǵan.
Sonymen qatar qaza tapqan kenshilerdiń bank aldyndaǵy qaryzy nazarǵa alynýda. Qaitys bolǵandar men olardyń jaqyn týystarynyń barlyq boryshyn naqtylaý úshin QR Qarjy naryǵyn retteý jáne damytý agenttigine hat jiberildi.
Qazirgi kezde Bank RBK, Kaspi jáne Halyk Bank-te jalpy somasy 47,5 mln teńgeni quraityn nesie men ipoteka anyqtaldy. Qaryzdy óteý boiynsha jumys júrgizilýde.
Oqiǵanyń sebebin anyqtaý
Alǵashqy nusqada qaiǵyly oqiǵaǵa taý jynysynyń opyrylýy sebep bolǵany aityldy. Alaida apattan qutqarý toby opyrylýdyń bolmaǵanyn anyqtady.
Kenishtegi jumys tergeý aiaqtalǵanǵa deiin toqtatyldy. Tabiǵi gazdyń jarylýyna ne sebep bolǵany taldanyp jatyr. Kompaniia Úkimettik komissiiamen jáne tergeý organdarymen jumys isteýde jáne qoldanystaǵy qaýipsizdik standarttaryna túzetý engizýdi josparlap otyr.
Kompaniianyń málimetinshe keiingi úsh jylda Qazaqmys eńbek qaýipsizdigine 87 mlrd teńgeden astam investitsiia salǵan, al 2025 jylǵa josparlanǵan qarjylandyrý kólemi 38 mlrd teńgeni quraidy.
Eske salaiyq, 17 aqpan kúni Ulytaý oblysy Jańaarqa aýdanynda "Qazaqmys" korporatsiiasy" JShS-niń Jomart kenishinde jeti jumysshy kóz jumdy.
