Foto: t.me/kazakhmys_news
Qaraǵandy oblysynda «Qazaqmys» korporatsiiasynyń qatysýymen áleýmettik jáne ónerkásiptik áriptestiktiń jańa kezeńi bastalady. 2026 jylǵy 27 aqpanda Qaraǵandyda jalpy somasy 6 mlrd teńgeden asatyn jobalardy júzege asyrýdy kózdeitin yntymaqtastyq týraly memorandýmǵa qol qoiyldy.
Kelisim aiasynda densaýlyq saqtaý, bilim berý, sportty damytý jáne eldi mekenderdi abattandyrý basym baǵyt bolyp aiqyndaldy. Bul mindet naqty nysandar arqyly júzege asyrylady. Balqash qalasynda jańa balabaqsha salý jáne aýmaǵyn abattandyra otyryp sý sporty túrleriniń bazasyn ashý josparlanýda.
2026 jyly Sheshenqara, Baimyrza aýyldarynda jáne Aqtaý kentinde birqatar áleýmettik joba júzege asyrylady. Atalǵan eldi mekenderde dárigerlik ambýlatoriia, sport kesheni jáne órt sóndirý deposyn salý josparlanǵan. Bul meditsinalyq kómektiń qoljetimdiligin arttyrýǵa, sportpen shuǵyldanýǵa qolaily jaǵdai jasaýǵa jáne órt qaýipsizdigin kúsheitýge múmkindik beredi.
Eki jylǵa eseptelgen qujat óńir men iri biznes arasyndaǵy ózara is-qimyldyń jańa kezeńin aiqyndaidy. Onda óndiriske ǵana emes, sonymen qatar áleýmettik áriptestikke de basymdyq beriledi.
«Bul memorandým tek óndiristik máselelerge ǵana qatysty emes. Onda áleýmettik jaýapkershilik, kásiporyndar ornalasqan eldi mekenderdiń turǵyndaryn qoldaý jáne áleýmettik nysan salý máseleleri qamtylǵan. Biz óz tarapymyzdan jan-jaqty qoldaý kórsetemiz. Búgin qol qoiylǵan memorandým júieli túrde júzege asyrylyp, josparlanǵan jobalardyń basym bóligi kelisim merzimi aiaqtalǵanǵa deiin oryndalady dep
senemiz», – dedi Ermaǵanbet Bólekpaev.
Sonymen qatar Qaraǵandy oblysynyń Kásipkerlik jáne ónerkásip basqarmasymen jáne «Saryarqa» ÁKK» AQ-men ónerkásiptik yntymaqtastyq týraly memorandýmǵa qol qoiyldy. Qujat jergilikti óndiristi damytýǵa, shaǵyn jáne orta biznesti qoldaýǵa baǵyttalǵan. Jańa óndiristi ornalastyrý úshin jer telimin berý jáne sapa men naryq talabyn saqtai otyryp, otandyq óndirýshilermen uzaq merzimdi ofteik-kelisimshart jasaý múmkindigi qarastyrylýda.
Ermaǵanbet Bólekpaev óńirde júiequraýshy kásiporyndarmen ózara is-qimyldyń oń tájiribesi qalyptasqanyn jáne ony keńeitip, aýqymyn arttyrýǵa bolatynyn atap ótti.
«Bizde tiimdi seriktestiktiń naqty mysaldary bar. Olardy kompaniia jumys isteitin basqa óńirlerde de qoldanýǵa bolady», – dedi óńir basshysy.
Óz kezeginde «Qazaqmys korporatsiiasy» JShS Basqarma tóraǵasy Rýslan Óskenáli óńirdiń kompaniia úshin strategiialyq mańyzyna jáne qol qoiylǵan kelisimderdiń naqty nátijege baǵyttalǵanyna nazar aýdardy.
«Qaraǵandy oblysy – biz úshin strategiialyq turǵydan asa mańyzdy óńir. Munda kompaniianyń negizgi óndiristik aktivteri – Qaraǵaily, Nurqazǵan, Balqash, Qaraǵandy quiý-mashina jasaý zaýyty (QQMJZ) shoǵyrlanǵan. Dál osy sebepti óńirde jumysymyzdy bastaǵan sátten bastap biz júieli áleýmettik jáne infraqurylymdyq qoldaýǵa basymdyq berdik. Búgin qol qoiylǵan memorandým – jai ǵana formaldylyq emes, aýmaqty damytýdyń naqty quraly. Osy baǵdarlamalardy iske asyrý óńirdiń áleýmettik-ekonomikalyq damýyna naqty úles qosyp, kózge kórinetin ári uzaq merzimdi nátije beredi dep senemin», – dep atap ótti «Qazaqmys korporatsiiasy» JShS Basqarma tóraǵasy Rýslan Óskenáli.
Qol qoiylǵan memorandýmdardy júzege asyrý óńirdiń áleýmettik infraqurylymyn nyǵaitýǵa, qosymsha jumys oryndaryn ashýǵa jáne jergilikti biznestiń damýyn qoldaýǵa múmkindik beredi. Qazaqmys úshin ózine qatysy bar aimaqtardy damytý – óńirdiń órkendeýine jáne halyqtyń ómir súrý sapasyn arttyrýǵa baǵyttalǵan júieli jumys bolyp tabylady.
