Mádeniet jáne sport ministri Aqtoty Raiymqulova «Qazaqfilm» kinostýdiiasy jekeshelendirilmeitinin málimdedi, dep habarlaidy QazAqparat.
«Álbette Qazaqfilmdi taratý týraly tipti áńgime de qozǵalǵan emes. Shyntýaitynda «Qazaqfilm» - Qazaqstannyń kinobrendi ispettes. Ol – Ortalyq Aziia aýmaǵyndaǵy kino shyǵaratyn eń iri óndiris oshaǵy. Onda kino shyǵaratyn tehnologiialardyń bári bar. Ózderińiz biletindei, kinostýdiia memlekettiń qatysýyndaǵy aktsionerlik qoǵam bolyp jumysyn jalǵastyrýda. Bul zańdy mártebe – kinostýdiianyń ózin-ózi aqtaitynyn jáne memlekettik sýbsidiiaǵa muqtaj emestigin kórsetedi», - dedi Aqtoty Raiymqulova OKQ alańy arqyly halyq aldynda esep berý kezdesýinde.
Aqtoty Raiymqulovanyń aitýynsha memleket biýdjetinen osy ýaqytqa deiin dýbliajǵa, tirajdaýǵa, distribýtsiia men kinony saqtaýǵa qarajat bólinip kelgenin aityp ótti.
«Jyl saiyn «Qazaqfilm» memlekettik tapsyrys aiasynda 270 mln teńge kóleminde aqsha alyp keldi. Kinostýdiia memleket qarajatymen ustalyp, jaqyn ýaqytqa deiin jumys istep kelgenin bilesizder. Qazirgi ýaqytta kino óndiretin kompaniialardyń aldynda jańa tegeýrinder paida boldy. Jańa tehnologiialar da paida bolýda», - dedi ol.
Ministr Ulttyq kinony qoldaý ortalyǵy qurylǵanyn, elde 114 jeke kinostýdiia, 112 animatsiialyq kinostýdiia baryn málim etti.
«2019 jyldyń qyrkúiegine deiin «Qazaqfilm» kinostýdiiasy jekeshelendiriletin nysandardyń qatarynda bolyp edi. Alaida ministrlik pen Úkimet úlken jumys atqaryp, «Qazaqfilm» kinostýdiiasy jekeshelendiriletin nysandardyń tiziminen alynyp tastaldy. Iaǵni «Qazaqfilm» jekeshelendirilmeidi. Memleket «Qazaqfilmdi» qoldaý úshin qoldan kelgen kómektiń bárin kórsetýde», - dedi ol.
