Ulttyq kitaphanada «Shalqar» radiosynyń 60 jyldyǵyna arnalǵan saltanatty is-shara ótip, jańa kitap tanystyryldy.
Mereitoilyq merekege QR Prezidentiniń keńesshisi Málik Otarbaev, QR Mádeniet jáne aqparat birinshi vitse-ministri Qanat Ysqaqov, QR Eńbek sińirgen qairatkeri, f.ǵ.d, professor Namazaly Omashev, QR Jýrnalister Odaǵynyń tóraǵasy Seiitqazy Mataev, «Qazaqstan» RTRK» AQ Basqarma tóraǵasy Ernur Býrahan, «Shalqar» radiosynyń ardagerleri men qyzmetkerleri, ziialy qaýym ókilderi qatysty.
Saltanatty jiyn Memleket basshysy Qasym-Jomart Toqaevtyń quttyqtaý hatymen ashyldy. Memlekettik Keńesshi Erlan Qarinniń, Premer-ministr Oljas Bektenovtiń, QR Premer-ministriniń orynbasary – Mádeniet jáne aqparat ministri Aida Balaevanyń, Senat tóraǵasy Máýlen Áshimbaevtyń jáne Májilis tóraǵalasy Erlan Qoshanovtyń quttyqtaýlary oqyldy. Radionyń damýyna úles qosqan ardagerler men qyzmetkerlerge marapat tabystaldy.
Arnanyń 60 jyldyǵyna orai jaryq kórgen «ULTTYŃ ÚNBAIRAǴY» atty kitaptyń tusaýkeser rásimi ótti. Oǵan radio ardagerleri Saýyq Jaqanova, Rýslana Qudaibergenova, Qusman Igisinov, Nurjan Jalaýqyzy, Áshirhan Telǵoziev, «Asyl kitap» baspasynyń direktory Jasulan Seidahmetov qatysyp, sóz sóiledi.
Sonymen qatar mereitoi aiasynda qazaqtyń tuńǵysh radiodiktory, Qazaq radiosynyń ardageri, KSRO-nyń Qurmetti radisi, Qazaq KSR-niń eńbek sińirgen mádeniet qyzmetkeri Mina Seiitova atyndaǵy diktorlar baiqaýy jariialandy. Naýryz aiynyń basynda Almaty qalasyndaǵy «Radio úii» ǵimaratynda tolyq jóndeýden ótken stýdiia ashylyp, oǵan qazaqtyń tuńǵysh radiodiktory Mina Seiitovanyń esimi berilgen edi.
Mereitoilyq is-shara barysynda «Shalqar» radiosynda ár jyldary eńbek etken ardagerler jáne qonaqtar estelikterimen bólisip, áserli keshtiń kýási boldy.
Gúlbaný Alpamysqyzy
