- Jumys toby bir aidyń ishinde qazaq-túrik litseilerine aýdit júrgizýi tiis. Bul týraly «QazAqparat» HAA-nyń resmi saýalyna jaýap bergen QR Bilim jáne ǵylymi ministrliginiń baspasóz hatshysy Áigerim Álibekova málim etti.
Onyń atap ótýinshe, qazirgi ýaqytta jumys toby tekserýge tiisti máselelerdiń tizilimi jasalýda. Atalǵan jumys tobynyń quramyna ministrliktiń bilim salasyna memlekettik baqylaý qyzmetin júzege asyrýǵa ókiletti ókilderi men basqa da múddeli taraptar kiredi. Olar oqý oryndarynyń bilim berý qyzmetiniń bilim salasyndaǵy zańnama talaptaryna sáikestigin anyqtaýy tiis.
«Oqý oryndaryna qatysty memlekettik baqylaý sharalary Qazaqstan Respýblikasynyń Kásipkerlik kodeksinde belgilengen merzim sheginde júrgiziletin bolady jáne otyz kúnnen aspaidy. Tekserý nátijesinde bilim berý uiymy qyzmetiniń zańnama talaptaryna sáikestigi nemese sáikessizdigi týraly sheshim qabyldanady», - dep habarlady ministrlikten.
Esterińizge sala keteiik, 15 shilde kúni Ystambulda áskeri búlik oryn alyp, bul kóterilisti «Túrik Qarýly kúshterine enip alǵan Fetxýllaxshyl lańkestik uiymy uiymdastyrdy» dep jariialandy. Osyǵan orai, Qazaqstanda qoǵam arasynda KATEV qorymen qurylǵan Qazaq-Túrik litseileriniń taǵdyry taqyryby qyzý talqyǵa túse bastady.
Al 5 tamyzda QR Prezidenti Nursultan Nazarbaev Túrkiiaǵa sapary barysynda Qazaqstandaǵy túrik litseileriniń jumysyn Qazaqstan men Túrkiia bilim berý ministrlikteriniń mamandarynan qurylǵan birlesken jumys toby tekseretindigin málim etken edi.
Sál keiinirek QR Bilim jáne ǵylym ministrliginde Fethýllah Giýlenmen bailanysynyń bar-joǵyn anyqtaý úshin qazaq-túrik litseilerin tekseretin jumys tobynyń qurylǵandyǵyn QR Bilim jáne ǵylym ministri Erlan Saǵadiev aitty.
«Prezidenttiń tapsyrmasyna sáikes, BǴM jumys toby qurylyp, jumysyn bastady. Biz túrik tarapymen bailanysta jumys isteimiz. Alaida bul oqý úderisine qatysy joq. Bul bizdiń qazaqstandyq mektepter jáne olar qatań tártipte elimizdiń standarttarymen qyzmet etýde. Biz bul litseilerdi birneshe márte teksergen edik. Olarǵa qatysty eshqandai narazylyq joq. Bul turǵyda litseiler burynǵysynsha jumystaryn jalǵastyrady», -dedi ministr.
