Qazaq dalasynda aqbókenniń sany 55 paiyzǵa artyp, 334 myńǵa jetti. Bul týraly Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Janýarlar dúniesi salasynda jyl saiyn sirek kezdesetin tuiaqty janýarlar men aqbóken sany artyp keledi. Aqbókenniń popýliatsiiasy 334 myńǵa jetip, ósim 55 paiyzdy qurady. Biz osy dinamikany saqtaý úshin bar kúsh-jigerimizdi salamyz», - dedi Maǵzum Myrzaǵaliev OKQ ótken halyqqa esep berý kezdesýinde.
Alaida ministr brakonerliktiń eńserilmei kele jatqanyn moiyndady.
«Memleket basshysy brakonerlikpen kúres máselesine erekshe mán berýde. Ministrlik Ishki ister ministrligi, Bas prokýratýramen birlesip 2019 jyly brakonerlik úshin jaýapkershilikti kúsheitý boiynsha qoldanystaǵy qylmystyq zańnamaǵa túzetýler engizdi. Qylmystyq kodekske tabiǵatty qorǵaý inspektorlary men qoryqshylardyń ómiri men densaýlyǵyna qol suǵýshylyq úshin qatań jaza qarastyratyn jeke bap engizdik. Inspektorlardyń aýyr eńbegin sezine otyryp, Prezidenttiń tapsyrmasyna sáikes inspektor mártebesin kóterýdi kózdep otyrmyz», - dedi ol.
Maǵzum Myrzaǵaliev osylaisha, brakonerlikpen kúresý úshin qazirgi zamanǵy quraldarmen inspektsiialarymyzdy qamtamasyz etetin jańa normativter (arnaiy tehnika, tós kameralary, bronejeletter) ázirlengenin jetkizdi.
