Dástúrli ánshi, Qazaqstannyń eńbek sińirgen ártisi Ramazan Stamǵaziev halyqty qaýipsizdik sharalaryn saqtap, tártipke baǵynýǵa shaqyrdy, dep habarlaidy QazAqparat.
«Qurmet» ordeniniń iegeri Ramazan Stamǵazievtiń aitýynsha, dert dendep barady, sondyqtan qazir barlyq sharýany ysyryp qoiyp, densaýlyqqa den qoiý kerek.
«Qazir koronavirýs indeti órshi tústi. Ony kúndelikti aqparat quraldary jazyp ta, aityp ta jatyr. Ókinishke qarai, sońǵy on kúnde qaitys bolǵandardyń sany artty. Kóz kórgen, eline tanymal adamdar ómirden ozyp jatyr. Buryn senbegen halyqtyń oi-pikiri tutastai ózgerdi. Sondyqtan qazir saqtyq kerek, óz basyńdy ǵana emes, ainalańdaǵy tanystaryńdy, týystaryńdy, balalaryńdy, nemerelerińdi osy dertten qorǵaityn kez jetti. Qazir balalar jazǵy demalysqa shyqty, osyny paidalynyp, adamdardy taǵy da bir júiege keltirý kerek shyǵar», – deidi Ramazan Stamǵaziev.
Sonymen qatar, ol óziniń de aýyrǵanyn aitty.
«Qazir qorqatyn jaǵdaiǵa jettik. Óitkeni, koronavirýspen aýyrǵan adamdarmen bailanysta bolǵandardyń aiaǵynan tik turyp júrgenderi kemde-kem. Bárimiz tumaýdyń orta jáne jeńil túrimen aýyryp turdyq. Basymyz aýyryp, súiegimiz qaqsap, kózimiz tartyp, júregimiz ainydy. Myna dárihanalardyń aldyndaǵy kezekti kórgen kezde adam shynymen de qorqady eken», – deidi ánshi.
Ramazan Stamǵaziev halyqty qaýipsizdik sharalaryn saqtaýǵa shaqyrdy.
«Kúni keshe ǵana memlekettik komissiia usynǵan karantindi saqtaýǵa tiispiz. Barlyqtaryńyz úide otyryńyzdar, jaqyndaryńyzdy qorǵańyzdar, tártipke baǵynaiyq. Baýyrjan Momyshulynyń aitqany bar - «Tártipke baǵynǵan el qul bolmaidy». Bul kún de kórgen tústei artta qalar, aman bolaiyq», – dep qorytyndylady Ramazan Stamǵaziev.
