Almaty oblysynda sońǵy alty aida 176 adam jol apatynan kóz jumǵan. Polisia.kz saitynyń málimetinshe, Almaty oblysynyń politsiia qyzmetkerleri "Qaýipsiz jol" jedel aldyn alý sharasynyń aiasynda halyqqa áleýmettik jeli men BAQ arqyly aqparat taratyp, jolda abai bolý kerektigin eskertken.
Quqyq qorǵaýshylardyń aitýynsha, "Qaýipsiz jol" sharasy joldaǵy tártipti jaqsartyp, jol apatynyń sanyn azaitady.
«Shara barysynda apatqa alyp keletin jol qozǵalysy erejesin óreskel buzý faktilerin anyqtaý maqsatynda reid ótkizip jatyrmyz. Sondai-aq, politseiler túsindirý jumysyn qolǵa alyp, kólik ieleri men jaiaý júrginshilerge jol erejesin saqtaýdyń mańyzy jaily broshiýra taratyp júr», - dep atap ótti Almaty oblysy PD jergilikti politsiia qyzmeti basqarmasy bastyǵynyń orynbasary Aidos Júnisov.
Resmi málimetke súiensek, jyl basynan beri oblys joldarynda 1056 jol apaty bolǵan. Onda 176 adam qaza taýyp, 1598 jolaýshy men júrgizýshi jaraqat aldy. Aita keteiik, «Qaýipsiz jol» sharasy 15 shilde men 14 tamyz aralyǵyn qamtidy.
