Foto: Aqorda
Prezident Qasym-Jomart Toqaev Konstitýtsiiany qabyldaýǵa arnalǵan saltanatty jiynǵa qatysty, dep habarlaidy Ult.kz.
Aqordada ótken is-sharaǵa Premer-ministr Oljas Bektenov, Parlament Senatynyń Tóraǵasy Máýlen Áshimbaev, Parlament Májilisiniń Tóraǵasy Erlan Qoshanov, Memlekettik keńesshi Erlan Qarin, Prezident Ákimshiliginiń basshysy Aibek Dádebai, Úkimet músheleri, ortalyq memlekettik organdardyń jetekshileri, oblys, Astana, Almaty jáne Shymkent qalalarynyń ákimderi, sondai-aq Konstitýtsiialyq komissiia men Jalpyulttyq koalitsiia músheleri qatysty.
Ortalyq referendým komissiiasynyń tóraǵasy Nurlan Ábdirov jańa Konstitýtsiia jobasy boiynsha respýblikalyq referendýmnyń qorytyndysyn jariialady.
Foto: Aqorda
Memleket basshysy Qasym-Jomart Toqaev Qazaqstan Respýblikasynyń Konstitýtsiiasyna jáne «2026 jylǵy 15 naýryzda qabyldanǵan Qazaqstan Respýblikasynyń Konstitýtsiiasyn iske asyrý jónindegi sharalar týraly» Jarlyqqa qol qoidy.
Saltanatty rásimnen keiin Prezident sóz sóiledi. Memleket basshysy Halyq Konstitýtsiiasy 1 shildeden bastap resmi túrde óz kúshine enetinin aitty. Al Konstitýtsiia kúnin memlekettik mereke retinde ulttyq deńgeide jyl saiyn 15 naýryzda atap ótetin boldyq.
"Elimizdiń barsha halqyna Ata zańymyz qutty bolsyn degim keledi! Konstitýtsiia – memleketimizdiń uzaqmerzimdi maqsat-muratyn aiqyndaityn, ultymyzdyń keleshek taǵdyryna tikelei áser etetin tarihi qujat. Bul – shyn máninde Halyq Konstitýtsiiasy. Onyń jobasy shamamen eki jyl buryn pysyqtala bastady. Keiin muqiiat talqylanyp, zerdelenip jazyldy. Konstitýtsiiamyz – tabandy ujymdyq eńbektiń nátijesi", - dedi ol.
Foto: Aqorda
Qasym-Jomart Toqaev memleket taǵdyryna bei-jai qaramai, daýys berý naýqanyna atsalysqan barsha azamatqa zor alǵys bildirdi.
"Ult múddesin tereń túsinip, Ata zańdy qoldap, daýys berýdi tarihi missiia sanaǵan jurtshylyqqa shynaiy rizashylyǵymdy bildiremin. Bul oraida, Pavlodar, Aqtóbe, Mańǵystaý, Jambyl, Túrkistan, Shyǵys Qazaqstan, Jetisý, Qyzylorda oblystarynyń jáne basqa da aimaqtardyń Ata zańdy maquldap, daýys bergen turǵyndaryna alǵysymdy aitqym keledi", - dedi Prezident.
Memleket basshysy Konstitýtsiialyq reforma jónindegi komissiianyń nátijeli eńbegine airyqsha toqtaldy.
"Komissiia músheleri óte aýqymdy, tiimdi jumys atqaryp, memleket pen qoǵamnyń ózara senimi jáne seriktestigi asa mańyzdy ekenin aiqyn kórsetti. Jalpyulttyq koalitsiia músheleri de qajyrly qyzmet etti. Olar jańa Konstitýtsiianyń mán-mazmunyn jurtshylyqqa keńinen túsindirip, qajetti úgit-nasihat jumysyn oidaǵydai atqardy. Búgin osy tarihi sátke orai, men Komissiia quramynda bolǵan barsha azamatqa jáne Koalitsiia múshelerine erekshe rizashylyǵymdy bildiremin", - dedi ol.
Prezident azamattarymyz tańdaǵan jańa Konstitýtsiia Qazaqstannyń jańa dáýirine jol ashatynyna senimdi.
"Qazaqstan – aiaǵyna nyq turǵan, halyqaralyq bedeli biik memleket. Elimiz ishki turaqtylyǵyn saqtap, ózge jurtpen dostyq qatynas ornatyp, zor senimmen alǵa qarai qadam basyp keledi.
Endi memleketimiz damýdyń dańǵyl jolyna túsedi. Sondyqtan bizge tatýlyq pen dostyq, sabyrlyq pen tabandylyq, jasampazdyq pen uqyptylyq, eńbekqorlyq pen senimdilik aýadai qajet.
Bizdiń biik maqsattarymyz, naqty josparlarymyz bar. Kóp sozbai bárimiz osy mindetterdi iske asyrýǵa kirisýimiz kerek", - dedi Qasym-Jomart Toqaev.
