Foto: Aqorda
Aqordada Qazaqstan Prezidentine segiz memlekettiń tótenshe jáne ókiletti elshileriniń senim gramotalaryn tapsyrý rásimi ótti, dep habarlaidy Ult.kz.
Senim gramotalaryn Norvegiia Koroldiginiń elshisi Helena Sand Andresen, Argentina Respýblikasynyń elshisi Enrike Ignasio Ferrer Vieira, Gana Respýblikasynyń elshisi Koma Stim Djehý Appiah, Mali Respýblikasynyń elshisi Seidý Kamissoko, Gambiia Respýblikasynyń elshisi Alkali Fanka Konte, Bangladesh Halyq Respýblikasynyń elshisi Muhammed Nazrýl Islam, Shri-Lanka Demokratiialyq Sotsialistik Respýblikasynyń elshisi Shobini Gýnasekera, Bosniia jáne Gertsegovina elshisi Ivan Orlich tapsyrdy.
Qasym-Jomart Toqaev diplomattarǵa Qazaqstannyń áleýmettik-ekonomikalyq jáne saiasi damý perspektivasy jóninde áńgimeledi.
– Syrtqy syn-qaterlerge qaramastan Qazaqstan aimaqtaǵy turaqty ári ekonomikasy qarqyndy el sanalady. Degenmen biz qol jetkizgen jetistikterge toqmeiilsimei, ekonomikalyq reformalardy dáiekti túrde jalǵastyryp kelemiz. 15 naýryz kúni elimizde jańa Konstitýtsiia boiynsha jalpyhalyqtyq referendým ótedi. Memleketti odan ári órkendetý jolyndaǵy bul mańyzdy qujatty halqymyz qoldaidy dep oilaimyz. Jańa Konstitýtsiia Qazaqstanda qolǵa alynǵan irgeli ózgeristerge berik negiz qalap, demokratiialandyrý men jan-jaqty jańǵyrtý isine qomaqty úles qosady, sol arqyly elimizdi damytýda tyń múmkindikterge jol ashyp, halyqtyń ál-aýqatyn arttyrady degen úmittemiz, – dedi Prezident.
Memleket basshysy Qazaqstannyń beibit syrtqy saiasat júrgizetinin atap ótti. Prezidenttiń aitýynsha, álemdegi barlyq kikiljińder men qaqtyǵystar diplomatiialyq quraldar arqyly tek beibit jolmen sheshilýge tiis.
Qasym-Jomart Toqaev Qazaqstan Shyǵanaq elderine árdaiym tilektes ekenin jáne shielenistiń tezirek sheshilýine úmit artatynyn jetkizdi.
Kezdesý sońynda Prezident shet memleketter elshileriniń jaýapty qyzmetine tabys tiledi.
