QR Kásipodaqtar Federatsiiasynyń «Jaqtaý», «Qorǵaý» múshelik uiymdary men elimizdegi eń iri taý-ken metallýrgiialyq kompaniia arasynda alty aptaǵa sozylǵan kelissózderdiń nátijesinde «ArselorMittal Temirtaý» AQ jumyskerleriniń jalaqysyn kóbeitetin bolyp sheshildi.
QR Kásipodaqtar federatsiiasynyń media ortalyǵy taratqan málimetterge qaraǵanda, «ArselorMittal Temirtaý» kompaniiasynyń bas direktory Nair Bidjý «ArselorMittal Temirtaý» AQ quramyna kiretin qurylymdyq bólimshelerdiń barlyq qyzmetkerleriniń jalaqysy osy jyldyń 1 shildesinen bastap ósetinin aitty.
Ósim jartylai 20000 teńge kóleminde qosymsha bekitilgen turaqty sipattaǵy ai saiynǵy tólem túrinde jáne jartylai jumyskerler jalaqysynyń 6 paiyzy mólsherinde bolady.
Kompaniia basshylyǵynyń pikirinshe, eńbekaqynyń ósimi kompaniianyń barlyq qyzmetkerlerine qatysty.
Kásipodaqtar men kásiporyn ákimshiligi Qazaqstan Respýblikasy Táýelsizdiginiń 30 jyldyǵyna orai 2021 jyldyń shildesiniń basynda kompaniianyń barlyq jumysshylaryna bir rettik 150 000 teńge tóleý túrinde qosymsha áleýmettik qoldaý týraly kelisimge keldi.
Jumyskerlerdiń ókilderi iaǵni metallýrgter jáne kómir óndirýshiler kásipodaqtarynyń kóshbasshylary Viktor Shetinin men Evgenii Býslaev qol jetkizilgen kelisimderge oń baǵa berdi.
QR Kásipodaqtar federatsiiasynyń media ortalyǵynyń habarlaýynsha, qabyldanǵan sheshimder áleýmettik áriptestik sheńberinde kelissózder ústelinde ymyraǵa kelýdiń jaqsy mysaly bolyp tabylady.
Viktor Shetinin «Eńbek Adamdarynyń áleýmettik-ekonomikalyq jaǵdaiyn jaqsartý máselelerin kelissózder ústelinde sheshý tiimdirek. Birlesken pikirtalastar bir-birin jaqsyraq túsinýge jáne óndiris protsesine, laiyqty eńbek jaǵdaiy men laiyqty jalaqyny qalyptastyrýǵa oń áser etetin birlesken sheshimder qabyldaýǵa septigin tigizedi», - dei kele, jumys berýshiler tarapyna rizashylyǵyn bildirdi.
Al Evgenii Býslaev «Biz jumyskerlerdiń de, jumys berýshilerdiń múddelerine sáikes keletin eń utymdy nusqany qabyldadyq. Meniń oiymsha, eńbek ujymy, adami kapital kez-kelgen kompaniianyń eń basty bailyǵy ekenin bári túsinedi», - dep atap ótti.
Kásipodaqtar men «ArselorMittal Temirtaý» ákimshiligi arasyndaǵy biryńǵai ujymdyq kelisimshartta jumyskerler jalaqysyn jyl saiyn indeksteý qarastyrylǵan. Tek osy jyldyń ózinde ol 7,5 paiyzdy qurady.
Esterińizge sala keteiik, kenshilerdiń jalaqysy 2017 jyly 30 paiyzǵa, metallýrgterdiki 18 paiyzǵa kóterildi, al 2019 jyly kompaniianyń barlyq sanattaǵy qyzmetkerleri úshin ósim 10,75 paiyzdy qurady.
