Almaty qalasynyń bilim berý sapasyn qamtamasyz etý departamenti basshysynyń orynbasary Gúldana Omarova onlain brifing barysynda kámeletke tolmaǵandardyń quqyqtary men múddelerin qorǵaý sharalary týraly aitty, dep habarlaidy "Ult aqparat".
Bilim berý sapasyn qamtamasyz etý departamentiniń ókili jyl saiyn oqýshylardyń jazǵy demalysy bastalysymen elimiz boiynsha 1-12 maýsym aralyǵynda «Balalar eńbegin paidalanýǵa qarsy 12 kún» ulttyq aqparattyq naýqan ótetinin atap ótti.
Sharalar aiasynda bilim berý organdarynyń ókilderi, politsiia qyzmetkerleri kásipkerlerge kámeletke tolmaǵandardy eńbekke zańsyz tartqany úshin jazaǵa tartylatynyn eske salady.
«18 jastan kishi kámeletke tolmaǵandar túnde jumys istei almaidy, olarǵa aýyr jumysty tapsyrýǵa bolmaidy. 16 jasqa deiin eńbek shartyna ata-analardyń biri qol qoiýy kerek. QR Eńbek kodeksine sáikes 14-16 jastaǵy balalar aptasyna 24 saǵattan, al 16-18 jastaǵy jasóspirimder 36 saǵattan artyq jumys istemeýi tiis», - dedi Gúldana Omarova.
Sonymen qatar, ol balalardyń zańsyz jumysqa tartylǵanyn kórgen adam myna qaýyrt jeli 225-18-80 nómirine qońyraý shalý kerektigin eskertti.
«Eger siz balalardyń densaýlyǵyna, qaýipsizdigine ziian keltirýi múmkin jumysqa tartylǵanyn bilseńiz, oǵan nemquraily qaramai, tiisti quzyrly organdarǵa birden habarlaǵanyńyz jón. Óitkeni, bala densaýlyǵy onyń quqyǵyn qorǵaý - bárimizdiń ortaq isimiz», - dedi spiker.
Gúldana Omarova 2019 jyly Telegram messendjerinde «Bala Qorgay» kanaly qurylǵanyn atap ótti.
Ol kámeletke tolmaǵandarǵa qatysty quqyq buzýshylyq nemese qatygezdik faktilerin tirkeýge arnalǵan. Kanaldy ashý bastamasy QR Bilim jáne ǵylym ministrliginiń balalardyń quqyqtaryn qorǵaý komitetine tiesili.
«Ótken aptada «Bala Qorgay» chatyna 63 suraq tústi. Shuǵyl áreket etý sharalary qabyldandy. Mysaly, ata-analarǵa keńes berilip, túsindirildi, ómirlik qiyn jaǵdaiǵa tap bolǵan balaǵa kómek kórsetildi», - dedi ol.
Bul rette kelip túsken máselelerdiń negizgi bóligi quqyqtyq aqparattandyrýǵa qatysty. Keri bailanys táýlik boiy, demalyssyz jumys isteidi.
