QR DSM taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev Qazaqstandaǵy qashyqtan oqytý tártibiniń jetistigin týraly aityp berdi, dep habarlaidy QazAqparat.
«Memlekettik bas sanitarlyq dárigerdiń qaýlysyna sáikes, jumystaǵy adamdardyń 70 paiyzy qashyqtan jumys júrgizý tártibine kóshken bolatyn. Oqytýdyń ózi de 100 paiyz – túgeldei qashyqtan júrgizýge aýystyrylǵanyn bilesizder. Áitse de qashyqtan jumys júrgizý tártibine kóshpegen ujymdardyń ishinde koronavirýsty juqtyrǵandardyń artyp kele jatqanyn kórip otyrmyz. Osy rette bir jarqyn mysaldy keltire keteiin: bilim júiesinde, mektepter, ýniversitetter men kolledjder tolyǵymen qashyqtan oqytýǵa kóship ketkennen keiin biz oqýshylar, stýdentter men muǵalimder arasynda virýs juqtyrǵandar múlde tirkelmei jatqanyn kórip otyrmyz», - dedi Timýr Sultanǵaziev Densaýlyq saqtaý ministrliginiń Facebook paraqshasyndaǵy suhbatynda.
Onyń aitýynsha, qashyqtan jumys júrgizý tártibine kóshpegen ujymdardaǵy jumyskerler qarapaiym saqtyq sharalaryn ustanbai, munyń saldary aiqyn kórinip otyr.
«Osyǵan bailanysty ótken aptadan bastap belsendi túrde jergilikti jerlerde reid sharalaryn júrgize bastadyq. Aimaqtardaǵy shtabtardyń bárine de osyndai tapsyrma berildi. Jedel shtabtar baqylaý komitetiniń, politsiia ókilderimen birge shyǵyp, meiramhanalar men dámhanalardy tekseredi. Ótken aptada 10 myńǵa tarta nysan tekserilip, 1 myńǵa tarta ereje buzýshylyq anyqtaldy. Osy tekseristiń nátijesi boiynsha jumysyn toqtatqan kásiporyndar da bar. Keibir kásiporyndarǵa qatysty ákimshilik hattama toltyryldy. Bul jumys jalǵasyn tabady», - dedi ol.
