Barlyq qyzmet túri elektrondy formatqa kóshiriledi. Bul týraly onlain rejimde halyq aldynda esep berýi kezinde Qarjy ministri Erulan Jamaýbaev málim etti, dep habarlaidy "Ult aqparat".
«Vedomstvonyń qurylymyna toqtalsam, qazir Qarjy ministrliginiń shtat sany 16 247 birlikti quraidy. Sońǵy eki jylda ministrlik aýqymdy ońtailandyrý jumystaryn júrgizdi. Osy oraida 1 965 birlik qysqartyldy. Búgingi tańda Ministrliktiń qurylymy ortalyq apparattan, 4 vedomstvodan jáne 3 vedomstvolyq baǵynysty uiymnan turady», - dedi Jamaýbaev.
Onyń aitýynsha, ministrlik tarapynan jeke jáne zańdy tulǵalarǵa memlekettik qyzmettiń 50 túri kórsetiledi, onyń ishinde 46 nemese 92% elektrondyq túrde júrgiziledi.
«2020 jyly barlyǵy 22,9 mln memlekettik qyzmet kórsetildi, onyń ishinde 22,2 mln nemese 97% elektrondyq túrde. Bolashaqta barlyq qyzmet túrin elektrondy formatqa kóshirý josparymyzda bar. Jalpy, ministrlik óz qyzmetinde barynsha ashyqtyq pen konstrýktivti tásildi alǵa tartady. Qoǵammen tyǵyz bailanysta jumys isteimiz. Memlekettik qarjy qoǵamdyq keńesi óz jumysyn sátti atqarýda. Osynyń barlyǵy Memleket basshysynyń «Halyq únine qulaq asatyn memleket» tujyrymdamasyna sai keledi», - dedi ministr.
