Almaty metrosynyń qurylysshylary 12 shildede jalaqylaryn eki ese arttyrýdy talap etip, jumysqa shyǵýdan bas tartty, - dep habarlaidy Tengrinews.kz tilshisi KTKtelearnasyna silteme jasap.
Azyq-túlik dúkenderine deiin qaryzǵa batqan metro qurylysshylary jalaqysynyń kóterilýin talap etti. Aitýlarynsha, jer astynda erinbei etken eńbegine alatyn ailyqtary nebári 51 myń 663 teńge. 15 jyldan beri basshylary jalaqysyn 15 teńgege de kótermedi, deidi olar. 51 myń teńge ailyqpen otbasyn asyraǵan qurylysshylardyń sońǵy márte qashan et jegeni esinde joq.
"Jurt bizdi 200-diń ústi, kóp alady dep oilaidy. Senbeitin bolsańyzdar, esep paraqshasyn kórsetýge bolady. Sońǵy qymbatshylyqty bilesiz, qandai bolyp jatqanyn, ol eshteńege de jetpeidi. Tipti ony aityp jatýdyń esh qajettigi joq", - deidi "Almatymetroqurylys" AQ jer asty úngýshisi Pahrdin Musaliev.
Jýrnalisterge jalaqy túbirtegin kórsetken qurylysshylar bet-júzin tómen qaratty. Sóitse, telearna tilshisiniń aitýynsha, "Almatymetroqurylys" kompaniiasynyń eń aýyr jumysyn atqaratyn azamattardyń ailyǵy bar-joǵy 76 635 teńge. Zeinetaqy men meditsinalyq saqtandyrý qory, taǵy kásipodaq jarnasyn tólegende, qolǵa tietini nebári 51 663 teńge. Metro basshylyǵy ailyqtaryn 15 jyldan beri 15 teńgege de kóbeitpepti. Eldegi eń iri megapolistiń metrosyn salǵan mamandar azyq-túlikti qaryzǵa alyp, al etti tek túsinde kóretinin aitqan.
"Aitsaq, "qaryzbyz biz" deidi. Ol bastyqtyń bizge aitqany: senderdiń ailyqtaryń 60 myń! 60 myń teńge azyq-túlikke ketti. Onyń ishine etti qospańyz. Et ol bólek, etti qaryzǵa baryp alady taǵy bireýden. Sonymen qaryzǵa istep júr bylai qarap tursańyz. Biz shahterdiń de jumysyn istep jatyrmyz, qurylysshynyń da jumysyn istep jatyrmyz, sylaqshy, eden jýýshy deidi, jer astynda solardyń báriniń jumysyn istep jatyrmyz. Metro júrsin dep júrmiz", - deidi "Almatymetroqurylys" AQ jer asty jumysshysy Daýytbai Almat.
Tilshiniń aitýynsha, jer astynda kúni boiy jer qazatyn 100-ge tarta jumysshy qýyqtai ǵana bólmede jýynady. Tórt adamǵa arnalǵan tar monshada tún ortasyna deiin uzyn-sonar kezek. Onyń ózi qabyrǵasyn kók basyp, tóbesi qulaǵaly tur.
Jumysshylardyń kiim aýystyratyn bólmesi - vagon. Munda 200-ge tarta temir shkaf bar. Biraq jumysshylar munda kiim ǵana aýystyrmaidy, osynda jýynady, tamaq ishedi. Terezeniń barlyǵy biteý. Tazalyqtan jurdai jerde tyshqan qaptaǵan. Kógergen iispen tynystap, shań jutqan qurylysshylardyń birazy densaýlyǵynan aiyrylyp, endigi múgedek atanǵan. Alaida jer astynda júrip tapqan dertti emdeýge kompaniia kók tiyn de tólemeidi eken. Tilshiniń sózinshe, jumysshylardyń jaǵdaiyna basy aýyrmaǵan basshylar basy aýyrǵanyn syltaýratyn suhbat berýden qashty.
"Men ol kisilerge aitam, meni túsirmei-aq qoiyńyzshy, men aýyryp turmyn, shyn aitamyn", - dedi "Almatymetroqurylys" AQ taý-ken departamentiniń direktory Dastan Erjekenov.
Qurylysshylarǵa qamqor bolady dep memleket osy nysanǵa bekitken maslihat depýtatyna da shaǵymdanypty. Onda halyq qalaýlysy qurylys basyna kelgen. Alaida artynsha koronavirýsqa shaldyqtym dep, at izin kesipti. Sodan beri úsh ai ótkenimen, depýtat shetelge taǵy emdelýge ketipti.
Jumysshylar budan bylai 51 myń teńge ailyqqa tózbeidi. Olar metro qurylysyn toqtatyp, úidi-úiine tarasqany habarlandy.
