"Memleket basshysy Nursultan Nazarbaevtyń tapsyrmasy boiynsha QR Premer-Ministri Kárim Másimov Atyraý oblysyna jumys saparymen keldi", - dep habarlaidy Ult.kz tilshisi Pm.kz-ke silteme jasap.
Sapar barysynda aimaqtyń áleýmettik-ekonomikalyq damýyn baǵalaý, belsendilermen jáne qoǵam ókilderimen problemalyq máselelerdi talqylaý josparlanýda.
Premer-Ministr IID MB aiasynda salynǵan Qashaǵan ken ornyndaǵy jasandy «D» aralyn, «Jigermunaiservis» JShS burǵylaý qashaýlaryn óndirý zaýytyn, «Caspian Royal Fish» JShS bekire balyǵy fermasyn, Atyraý munai óńdeý zaýytyn aralaidy dep kútilýde. Sonymen qatar, Kárim Másimov «Samuryq-Qazyna» ulttyq ál-aýqat qory» AQ qoldaýymen salynǵan «Nursaia» shaǵyn aýdanyndaǵy «Jeruiyq» turǵyn úi keshenin, «Azamattarǵa arnalǵan úkimet» memlekettik korporatsiiasynyń qalalyq bólimin jáne «Kaspiimunaigaz» ǴZI JShS zerthanasyn aralaidy.
Premer-Ministr jumys sapary aiasynda kásipkerlermen kezdesý ótkizip, balyq sharýashylyǵynyń damý perspektivalaryn talqylaidy, sondai-aq otandyq munai servisin damytý máseleleri boiynsha keńes ótkizedi.
Búginde Atyraý oblysynyń halqy 598 myńnan astam, onyń shamamen 47% - qala turǵyndary.
Aimaq ekonomikasynyń negizi - munai óndirisi. Oblysta kóptegen munai ken oryndary bar, olardyń eń irisi - Teńiz, sondai-aq munai óndiretin jáne óńdeitin, munai qaldyqtaryn tazalaityn jáne munai-gaz mashina jasaý kásiporyndary osynda ornalasqan.
Indýstriialandyrý kartasyn júzege asyrý kezeńinde oblysta 37 joba iske qosyldy, sol arqyly 2,8 myń jańa jumys orny ashyldy. Naqty sektorda jańa óndiris oryndarynyń ashylýy, shaǵyn biznesti damytý jáne jańa áleýmettik nysandardyń ashylýynyń arqasynda biyl 7 615 jańa jumys orny quryldy.
Respýblikalyq kólemde oblystyń jalpy respýblikalyq ónimdegi (JRÓ) úlesi 12,6% quraidy.
