Májilistiń jalpy otyrysynda depýtat Fahriddin Qarataev karerlerdi zańsyz igerý jaǵdaiyna tosqaýyl qoiýdy surady, dep habarlaidy "Ult aqparat".
«Bas prokýratýranyń málimetinshe, sońǵy úsh jylda respýblikada karerlerdi zańsyz igerýge bailanysty 303 qylmystyq quqyq buzýshylyq tirkelgen. Onyń ishinde Aqmola oblysynda 32, Almaty oblysynda - 39, Túrkistan oblysynda - 32, Shymkent qalasynda - 11, Pavlodar oblysynda -23, Shyǵys Qazaqstan oblysy boiynsha - 27, sondai-aq basqa oblystarda osyndai jaǵdai tirkelgen. Mysaly Nur-Sultan qalasynyń mańynda 54 zańsyz karer anyqtalǵan, Jambyl oblysynda jer qoinaýyn óz betinshe qazǵandardyń 32-si tirkelgen. Búgingi tańda atalǵan máseleler ashyq kúiinde qalyp otyr», - dedi depýtat Úkimet pen Bas prokýrartýra atyna joldaǵan saýalynda.
Onyń paiymynsha, bul jaǵdai azamattardyń narazylyǵyn týyndatady jáne birqatar jaǵdailarda áleýmettik shielenistiń sebebi bolyp jatady.
«Osylaisha, kóptegen óńirlerde keń taralǵan paidaly qazbalardy – qiyrshyq tasty, qumdy, sazdy, qara topyraqty jáne olardyń basqa da túrlerin zańsyz óndirýdiń kóptegen faktileri baiqalady. Al qorshaǵan ortaǵa keltirilgen zalaldyń jalpy somasy milliardtaǵan teńgeni quraidy. Budan basqa, lastanǵan aýanyń saldarynan halyq densaýlyǵynyń nasharlaýy, sondai-aq zańsyz áreketterdiń saldarynan infraqurylymnyń buzylýy alańdatarlyq úrdis bolyp otyr», - dedi Fahriddin Qarataev.
Osy oraida depýtat karerler jumysynyń jai-kúiine, qaýipsizdigine jáne zańdylyǵyna túgendeý júrgizý, karerlerdiń jumysyn zańnama talaptaryna sáikes keltirý, karerlerge jáne jalpy paidaly qazbalardy óndirýge jer bólý protsesiniń ashyqtyǵyn arttyrý usynysyn jasady.
