Almaty oblysynyń Qarasai aýdanynda sel júrip, saiajaidaǵy 6 úi qirady, dep habarlaidy "Ult aqparat".
«7 shildede saǵat 21:39-da Almaty oblysynyń TJD Qarasai aýdanyndaǵy Qyrǵaýyldy aýylynan joǵary ornalasqan «Gornyi sadovod» baý-baqsha qoǵamynda sý qubyrynyń jarylý saldarynan lai balshyq kóshkeni habarlanǵan.
Zerdeleý nátijesi boiynsha diametri 50 mm sý qubyrynan sý aǵyp, saldarynan topyraq ezilgen. Keiin lai-balshyq kóshkeni anyqtaldy. Lai kóshkin tehnogendik geneziske (adam áreketinen landshaftyń ózgerýi) jatady», - delingen Almaty oblystyq Tótenshe jaǵdailar departamentindegi baspasóz qyzmetiniń habarlamasynda.
Vedomstvonyń aqparatyna sáikes, oqiǵa saldarynan saiajaidaǵy 6 úi qiraǵan, olardyń 3-i qaraýsyz qalǵan. Taǵy bir saiajai jartylai zardap shekken. Oqys oqiǵadan eshkim zardap shekpedi.
«Balshyq massasynyń kólemi shamamen 50 myń tekshe metr, uzyndyǵy 200 metr, shamamen 310 metrge jyljyǵan, jalpy uzyndyǵy 510 metr, túsý ornynan eni 50 metr jáne sońyna taman 7 metr, biiktigi 1-den 7 metrge deiin jetti.
Qazirgi ýaqytta aýmaqty tazartý júrgizilip jatyr. Zardapty joiý jumystaryna Almaty oblysy TJD, Almaty qalasy TJD, TJM №28237 áskeri bólimi, TJM AShQJ, «Qazseldenqorǵaý« MM, Almaty qalasy Apattar meditsina ortalyǵy, Almaty oblysy politsiia departamenti jáne jedel meditsinalyq járdem brigadalary jumyldyryldy», - dep tolyqtyrdy atalǵan vedomstvonyń baspasóz qyzmetinen.
