Elimizde tótenshe jaǵdaidyń aiaqtalýyna bailanysta salyq jáne keden tekserýleri jańartyldy. Bul rette kásipkerlik sýbektileriniń jumys jasaý rejimi eskeriletin bolady, dep habarlaidy QR Qarjy ministrligi Memlekettik kirister komitetiniń baspasóz qyzmeti.
«Eger de tekseriletin kásiporynnyń qyzmetkeri karantinge ketken bolsa, onda kásiporynnyń jumysy qaita jandanǵan ýaqytqa deiin tekserý ýaqytsha toqtatylady. Bul rette kásipkerlik sýbektisine qujattardy usyný týraly talapnama tabys etiledi», delingen habarlamada.
Komitettiń málimetinshe, búgingi tańda memlekettik kirister organdarynda 1 403 salyq jáne 382 kedendik tekserýi óndiriske alynǵan.
«Syrtqy ekonomikalyq qyzmetke qatysýshylarmen tikelei bailanysty azaitý úshin, jergilikti jerlerde keden tekserýiniń basym bóligi kásiporynǵa barmai-aq, qashyqtan júrgiziledi. Ondai tekserý sany 60-tan asady», delingen habarlamada.
Sondai-aq, kásipkerlerdi qoldaý maqsatynda Memlekettik kirister komiteti 2020 jyldyń ekinshi jartyjyldyǵyna salyq tekserýiniń kestesin jasaýdan bas tartqan.
«Iaǵni 700-ge jýyq tekserý jasalmaidy. Naqty buzýshylyq boiynsha ǵana jospardan tys tekserý júrgiziledi», delingen habarlamada.
