Karantin Qazaqstan halqynyń emigratsiiasyn baiaýlatty. Biylǵy birinshi toqsanda qonys aýdarǵandardyń sany 12 paiyzǵa qysqardy, – dep habarlaidy finprom.kz.
«Biylǵy qańtar-naýryz aralyǵynda elden 7,3 myń adam ketip, bul kórsetkish ótken jyldyń sáikes kezeńine qaraǵanda 12,1 paiyzǵa az boldy. Sonymen qatar, 2020 jyldyń atalǵan kezeńinde Qazaqstanǵa kelgenderdiń sany 34,4 paiyzǵa artyp, 4,3 myń adamdy qurady», - delingen taratylǵan aqparatta.
Óńirler boiynsha qarastyrsaq, elden qonys aýdarǵandardyń kóbisi Shyǵys Qazaqstan oblysynan tirkeldi, iaǵni 1,2 myń adam boldy. Qostanai oblysynan 917 adam, Pavlodar oblysynan 857 adam turǵylyqty jerin aýystyrdy, sondai-aq Qaraǵandy men Soltústik Qazaqstan oblystarynda bul kórsetkish sáikesinshe 830 jáne 728 adamdy qurady.
Olardyń kóbisi Reseige barǵan (6,4 myń adam), al Germaniiaǵa - 456 adam, Ózbekstanǵa 115 adam qonys aýdarǵan. Bul turǵyda TOP-5 eldiń qataryna AQSh (106 adam) pen Belarýs (51 adam) endi.
