Aqmola oblysynyń bas memlekettik sanitarlyq dárigeri Ainagúl Mýsina jýrnalistermen ótkizgen brifingte elorda mańyndaǵy aýdandardyń turǵyndaryn qandai ózgerister kútip turǵanyn málimdedi, dep habarlaidy QazAqparat.
Mýsinanyń aitýynsha, qazirgi ýaqytta Aqmola oblysynda koronavirýstyq infektsiiamen syrqattanýshylyq boiynsha epidemiologiialyq jaǵdai salystyrmaly túrde turaqty. 15 maýsymnan bastap óńir «jasyl» aimaqta ornalasqan. Sońǵy aptada tirkelgen jaǵdailardyń sany 1,2 ese azaidy. Iaǵni, 295-ten 246-ǵa deiin, bul 50 jaǵdaiǵa az.
«Táýligine 40 jańa COVID-19 jaǵdaiy tirkeledi. Alaida, búgingi tańda Qostanai, Pavlodar oblystarymen shektesetin aýdandarda COVID-19 juqtyrǵandar sanynyń ósýi baiqalady. Sonymen qatar, Koronavirýstyq infektsiianyń taralý qarqyny boiynsha áli de «qyzyl» aimaqta turǵan Nur-Sultan qalasynan halyqtyń qatynaýy saqtyqty jáne epidemiologiialyq jaǵdaidyń nasharlaýynan qorǵanýdy talap etedi», - dep atap ol.
Brifingte aitylǵandai, elorda mańyndaǵy aýdandarda oblystyń basqa óńirlerimen salystyrǵanda virýstyń taralý deńgeii joǵary. Máselen, maýsym aiynda Arshaly aýdanynda - 83, Tselinograd aýdanynda - 90, Aqkól aýdanynda - 40, Shortandy aýdanynda - 24 jaǵdai tirkelgen.
Óńirdiń bas memlekettik sanitarlyq dárigeriniń aitýynsha, 27 maýsymnan bastap jańa qaýlymen Aqmola oblysynyń tórt astanalyq óńiri - Tselinograd, Shortandy, Aqkól jáne Arshaly aýdandary úshin qosymsha shekteý karantindik sharalary engiziledi.
Sonymen, bul aýdandar úshin ne ózgeredi?
Saýda-oiyn-saýyq ortalyqtary, saýda úileri, saýda ortalyqtary, azyq-túlik emes dúkender 27 maýsymnan bastap saǵat 10-nan 22-ge deiin jumys isteidi. «Ashyq» jobasyna qatysatyn nysandardy qospaǵanda, balalar oiyn alańdary men attraktsiondarynyń qyzmetine tyiym salynady. Dámhana, meiramhanalar, dúkender janyndaǵy barlar jáne t.b. úlgidegi qoǵamdyq tamaqtaný nysandary (úi-jaida) 50 paiyzǵa deiin toltyrylǵan jaǵdaida, saǵat 07:00-den 20:00-ge deiin jumys rejimi bar 50 orynnan aspaityn jaǵdaida jumys isteitin bolady. 20:00-den 07:00-ge deiin osy nysandardyń ónimdi jetkizýge ótkizýine ǵana jol beriledi. Senbi jáne jeksenbi kúnderi fitnes-ortalyqtar, ioga-ortalyqtar, jattyǵý zaldary men sporttyq-saýyqtyrý ortalyqtary, basseinder, jabyq azyq-túlik emes bazarlar jumysyn toqtatady. Senbi kúni Qazposhta da, HQKO da jumys istemeidi. Jeksenbi kúnderi qoǵamdyq kólik jumysyn toqtatady (bar bolsa). Eger uiymnyń shtat kestesinde 20-dan astam qyzmetker bolsa, olardyń keminde 80 paiyzy qashyqtyqtan jumys isteýge kóshýi kerek.
Sonymen birge, Mýsina aqmolalyqtardy barlyq karantindik sharalardy saqtaýǵa shaqyrdy jáne olar saqtalmaǵan jaǵdaida óńirdegi jaǵdai kez kelgen ýaqytta nashar jaqqa ózgerýi múmkin ekenin eske saldy.
