1 maýsymda Qaraǵandy oblysynda shomylý maýsymy bastalady. Óńirde resmi túrde shomylýǵa arnalǵan 83 oryn anyqtaldy. Atap aitqanda, Qaraǵandyda Fedorov sý qoimasynyń qalalyq jaǵajaiynda jáne Ortalyq mádeniet jáne demalys saiabaǵynyń kólinde shomylýǵa ruqsat etilgen, dep habarlaidy "Ult aqparat".
Qutqarýshylar atap ótkendei, adamdar jabdyqtalmaǵan jáne oǵan arnalmaǵan jerlerde: jabaiy jaǵajailarda, jasandy sý aidyndarynda shomylǵan kezde sýǵa batyp ketetin jaittar jii kezdesedi.
«Kóp turǵyndar ystyq kúnder bastalysymen sý qoimasyna asyǵady. Este saqtaý kerek, olardyń barlyǵy júzý úshin jabdyqtalmaǵan. Shomylýǵa arnalǵan oryndar qutqarý beketimen, balalardyń shomylýyna arnalǵan ýchaskemen (tereńdigi – 1,2 metrden artyq emes), daýys zoraitqysh qurylǵylarmen jáne telefon bailanysymen, qaraý munarasymen, sondai-aq kezekshi meditsinalyq personaly bar jáne qajetti qural-saimandarmen jáne dári-dármektermen jabdyqtalǵan alǵashqy meditsinalyq kómek kórsetýge arnalǵan úi-jaimen jabdyqtalýy tiis», - dep habarlady TJD.
Aldaǵy shomylý maýsymy qaiǵyly oqiǵalarsyz ótýi úshin Qaraǵandy oblysy TJ Departamenti sýdaǵy qaýipsizdik erejelerin saqtaýǵa shaqyrady.
Mynadai áreketterge jol berilmeidi:
- sýǵa kirýge jáne alkogoldik jáne esirtkilik mas kúiinde shomylýǵa;
- qaiyqtardan, katerlerden, ailaqtardan, sondai-aq osy maqsattarǵa beiimdelmegen qurylystan sýǵa sekirýge;
- tekserilmegen jáne jabdyqtalmaǵan jerlerde súńgýge;
- júzý shekarasyn belgileitin qurylǵylardan asyp ótýge;
- júzýge arnalmaǵan zattarmen júzýge;
- sý aidyndaryn lastaýǵa jáne qoqystaýǵa;
- jaǵalaýda jáne kiim aýystyratyn bólmelerde demalýshylarǵa jaraqat ákelýi múmkin qoqystardy qaldyrýǵa;
- jalǵan dabyl qaǵyp aiqailaýǵa;
- tehnikalyq jáne eskertý belgilerine kóterilýge;
- balalarǵa eresekterdiń qaraýynsyz sýǵa kirýge;
Qajet bolǵan jaǵdaida kásibi kómek kórsetiletin belgilengen oryndarda shomylýǵa keńes beremiz.
Qaraǵandy oblysy TJD baspasóz qyzmetiniń aqparaty boiynsha , ótken jylǵy shomylý maýsymynda óńirdegi sý aidyndarynda 12 adam batyp ketken, onyń ishinde tórteýi - bala.
