Jeksenbi kúni keshke Qaraǵandy qalasynyń birqatar kóshelerinde elektr qýaty óship qaldy. Apattyń sebebi elektr jelisinde paida bolǵan órt boldy. Búgin qala ákimi bolǵan jaǵdaiǵa túsinikteme berdi, dep habarlaidy "Ult aqparat".
23 mamyr kúni keshke Qaraǵandyda elektr jelisinde órt shyqty. Saldarynan Erýbaev, Gogol, Chijevskii kósheleri men N.Nazarbaev dańǵylyndaǵy úilerdiń bir bóligi jaryqsyz qaldy.
TJD baspasóz qyzmeti habarlaǵandai, sarapshylardyń qorytyndysy boiynsha órt qoqystyń janýynan paida boldy, jalyn keiinnen jelilerdiń tuiyqtalýyna ákep soqqan.
«Jiyrma úshinshi mamyr 21.40-ta Prigorodnaia kóshesindegi órt týraly habarlama kelip tústi. Segiz qýma metr joǵary voltty kabel men 30 sharshy metr qurylys qoqysy janyp ketti. 22.22-de órt sóndirildi. Oqiǵa ornynda Qaraǵandy oblysy TJD jeke quramynan 10 adam jáne 2 birlik tehnika jumys istedi. Qaza bolǵandar men zardap shekkender joq. Órttiń sebebi - ashyq ot kózi» dep habarlady vedomstvoda.
Jaǵdaiǵa qatysty «Qaraǵandy Jaryq» JShS de túsinikteme berdi. Kompaniia ókilderi órtten zardap shekken elektr jelileri qaita qalypqa keltirilgenin habarlady.
«Prigorodnaia, 10 kóshesindegi elektr berý jelileriniń astyna ruqsatsyz qoqys jaǵý saldarynan órt shyǵyp, Gogol, Erýbaev, Chijevskii kósheleri jáne Nazarbaev dańǵyly boiynsha ishinara tutynýshylardy energiiamen jabdyqtaý ajyratyldy. 2 fider zaqymdaldy: birinshisi keshe 23 saǵat 30 minýtta qosyldy, ekinshisi jaqyn arada jumys istei bastaidy».
Qala ákimi Ermaǵanbet Bólekbaev Facebook paraqshasynda osy oqiǵaǵa túsinikteme berdi. Qala basshysy órttiń shyǵý sebebin atap ótti.
«Prigorodnaia kóshesiniń turǵyndary elektr berý jelileriniń astyndaǵy ruqsat etilmegen qoqys ornyn órtep jiberdi, bul EJ tirekteriniń órtenýine ákeldi. Qazirgi ýaqytta órt sóndirildi, jóndeý brigadasy tutynýshylardy rezervtik elektrmen jabdyqtaýǵa aýystyrýmen ainalysýda, sondai-aq elektr berý jelisin qalpyna keltirý boiynsha jumystar uiymdastyryldy. Jaqyn arada energiiamen jabdyqtaý qalpyna keltiriledi. Kináliler jaýapqa tartylady. Osyndai jaǵdailardyń aldyn alý úshin barlyq qaraǵandylyqtardy otpen muqiiat bolýǵa shaqyramyn», - dep jazdy qala ákimi.
