Qaraǵandy oblysynyń Qarajal qalasy men Jańaarqa aýdanynda koronavirýsqa qarsy vaktsina alǵandar arasynda shipajaiǵa joldamalar men baǵaly syilyqtar oinatylýda, dep habarlaidy "Ult aqparat".
Qarajalda utys oiyny 11 maýsymda bastalyp, 15 shildege deiin jalǵasady. Onyń qorytyndysy apta saiyn beisenbi kúni saǵat 16:00-de @karazhal.mso Instagram-paraqshasynda tikelei efirde shyǵarylady. Baǵaly syilyqtar tiziminde mikrotolqyndy peshter, mýltipisirgishter, taǵamdyq protsessorlar jáne elektr sháinekteri bar.
«Alǵashqy nátijeler 18 maýsymda shyǵaryldy. Utys oiynyna Qarajal men Jáirem kentiniń 150-den astam vaktsinalanǵan turǵyny qatysty. Lotereiany ótkizýdiń ashyqtyǵyn Qarajaldyń Qurmetti azamaty Meshitbai Omarov, qalalyq máslihat depýtaty Artem Kim jáne demeýshi kompaniianyń ýchaske bastyǵy Aleksei Kartashev baqylady. Jeńimpazdar Erkebulan Ismailov, Aleksandra Shvab jáne Meiramgúl Bazylova boldy. Kelesi efirler 24 maýsymǵa, 1, 8 jáne 15 shildege josparlanǵan», – dep habarlady Qarajal ákimdiginde.
Kelesi utys oiynynyń qatysýshylary 18 maýsymnan keiin ekpe alatyn Qarajal jáne Jáirem turǵyndary bola alady. Olardyń tizimin baiqaý uiymdastyrýshylaryna qala men kenttiń vaktsinatsiia pýnkteri usynady.
Jańaarqa aýdanynyń vaktsinalanǵan turǵyndary arasynda «Saryaǵash» shipajaiyna joldamalardyń utys oiyny 19 maýsymda bastaldy. Aktsiianyń maqsaty – turǵyndardy vaktsina alýǵa yntalandyrý jáne pandemiiamen kúresý bolyp tabylady.
«Birinshi komponentti alý úshin vaktsinatsiia ortalyǵyna kelgen turǵyndarǵa arnaiy nómirlengen biletter taratylady. Qatysýshy biletti saqtap, @zhanaarkazhastaryInstagram-paraqshasynda ótetin tikelei efirge mindetti túrde qatysýy tiis. Ekpe alýshylar sany 500 adamǵa jetken kezde tikelei efir ýaqyty qosymsha habarlanatyn bolady», – dep atap ótti Jańaarqa aýdany ákimdiginde.
