Foto: ashyq derekkóz
Qaraǵandy oblysynyń mamandandyrylǵan aýdanaralyq ekonomikalyq soty ýákiletti organnyń litsenziiasyz bilim berý qyzmetin júzege asyrǵan JShS-ny taratý týraly talabyn qanaǵattandyrdy, dep habarlaidy Ult.kz.
Sot materialdaryna sáikes, seriktestik 2025 jylǵy 13 mamyrda «jalpy orta bilim berý» negizgi qyzmet túrimen tirkelgen. Alaida 2025 jylǵy 2 qyrkúiekten bastap tiisti litsenziiasyz oqý protsesin júrgizgen. Buǵan deiin kompaniia Ákimshilik quqyqbuzýshylyq týraly kodekstiń 463-baby 1-bóligi boiynsha ákimshilik jaýapkershilikke tartylyp, aiyppuldy tolyq tólegen.
JShS ókilderi talap qoiýdy moiyndamaǵan. Olardyń aitýynsha, uiym 280 oryndyq mamandandyrylǵan mektep jobasyn júzege asyrý úshin qurylǵan. Ǵimarat jeke investitsiialar esebinen salynǵan, qazirgi tańda mektepte 166 oqýshy bilim alady. Shtatta 35 qyzmetker jumys isteidi.
Sondai-aq seriktestik litsenziia alý úshin qujattardyń 90 paiyzdan astamy daiyn bolǵanyn, 2026 jylǵy 3 aqpanda berilgen ótinishtiń qaralyp jatqanyn málimdegen. Olar ata-analar tarapynan shaǵym túspegenin jáne bilim sapasy tómendemegenin alǵa tartqan.
Alaida sot ýákiletti organnyń buǵan deiin JShS-ǵa litsenziia berýden eki ret bas tartqanyn, bul sheshimderge shaǵym jasalmaǵanyn anyqtaǵan.
Sot litsenziia bilim berý uiymynyń balalardy oqytýǵa quqyǵyn rastaitynyn, memlekettik standarttardyń saqtalýyn, bilikti pedagogtar men qaýipsiz infraqurylymnyń bolýyn qamtamasyz etetinin atap ótti. Sonymen qatar, tek litsenziiasy bar mektepter ǵana memlekettik úlgidegi attestat berýge quqyly ekeni kórsetilgen.
Litsenziianyń bolmaýy bilim sapasyna áser etpeidi degen ýáj sot tarapynan negizsiz dep tanyldy.
«Bilim týraly» zańnyń 40-baby 2-1-tarmaǵyna sáikes, sot zańdy tulǵany taratý týraly talapty qanaǵattandyrdy.
Sot sheshimi ázirge zańdy kúshine engen joq.
