20–22 shildede musylmandardyń basty merekeleriniń biri – Qurban ait atap ótiledi. Qurbandyq shalý rásimi qalai ótetinin brifingte Qaraǵandy oblysynyń bas imamy Ómirzaq Bekqoja aityp berdi, dep habarlaidy "Ult aqparat".
«Biyl qurbandyqtar qurban2021.kz saity arqyly onlain jasalady. Sait iske qosylǵan. 17 shildede tapsyrystardy qabyldaý bastalady. Sondai-aq ait namazy oqylmaidy. Ótken jyly da solai boldy», – dep atap ótti Ómirzaq Bekqoja.
Qurbandyq shalǵysy keletinderdiń bári saitta óz aimaǵyn tańdaidy, sodan keiin maldyń qunyn qosymsha arqyly tóleidi.
Óńirlerde WhatsApp nómirleri jumys isteidi, onda tapsyrys berýshiler etti kimge bergisi keletinin kórsetedi.
Barlyq qurbandyq eti muqtaj adamdarǵa beriledi. Tapsyrys berýshilerge olardyń qalaýy boiynsha beine jáne fotoesep usynylady.
Sondai-aq qurbandyq shalýdy oflain jasaý múmkindigi bar. Ol úshin oblystyń qalalary men aýdandarynda arnaiy oryndar bekitildi.
Qaraǵandyda mal soiatyn úsh pýnkt bar:
- «Arai.kz», Gogol k-si, 2/23;
- JK «Abishev», Reznik k-si, 18;
- «Hasenov» ShQ, S. Seifýllin k-si, 53.
«Munda sanitarlyq normalar saqtalady jáne veterinarlyq qyzmettiń ruqsaty bar. Biraq bul jerlerde adamdar kóp jinalýǵa jol berilmeidi. Qalada mal satýǵa tek arnaiy jabdyqtalǵan «Arai.kz» alańynda ǵana ruqsat etilgen. Aýlalarda nemese kólikterde satýǵa tyiym salynady. Fermerlerdi osyny eskerýge shaqyramyz. Sondai-aq, biz fermerlermen kelisimge qol qoidyq, oǵan sáikes olar qoidyń qunyn belgili bir baǵadan asyrmaýy kerek. Oblysta Qurban aitqa kelesi baǵa bekitildi: qoi – 75 myń teńge, eshki – 55 myń teńge jáne iri qara – 420 myń teńge», – deidi spiker.
Ómirzaq Bekqojanyń aitýynsha, meshitke Qurban ait merekesine kómek alýǵa ótinishter kelip túsýde.
Muqtajdar tizimi jasalǵannan keiin eriktiler mereke kúnderi et pen azyq-túlik jiyntyqtaryn tasymaldaidy.
Ótken jyly osyndai kómekti 3 689 muqtaj otbasy aldy.
Sondai-aq, muqtaj adamdarǵa qurban2021.kz saity arqyly qurbandyq etine ótinish berý múmkindigi bar.
Qurban ait merekesi jáne qurbandyq shalý týraly qosymsha aqparatty oblys turǵyndary (8-7212) 77-17-47 jáne 8-702-403-99-50 (WhatsApp) nómirinen ala alady.
