Foto: inbusiness.kz
Qaraǵandy oblysynyń Osakarov aýdanynda banktiń burynǵy menedjeri alaiaqtyq jasady degen kúdikpen ustaldy. Tergeý nusqasyna sáikes, ol zeinetkerlerdiń atyna nesie rásimdep, qarajatty óz paidasyna aýdaryp otyrǵan, dep habarlaidy Ult.kz.
Politsiiaǵa alǵash bolyp 67 jastaǵy aýdan turǵyny shaǵymdanǵan. Onyń aitýynsha, belgisiz bireý atyna shamamen 1,5 million teńge kóleminde nesie rásimdegen. Áiel buǵan deiin nesie maquldanbady dep oilap júrgen.
Tergeý barysynda kúdikti tez anyqtaldy. Ol – banktiń 36 jastaǵy burynǵy menedjeri. Quqyq qorǵaý organdarynyń málimetinshe, ol klientterdiń nesie alýǵa tapsyrǵan qujattaryn paidalanyp, maquldanǵan qarajatty olardyń kelisiminsiz óz shotyna aýdaryp otyrǵan.
Keiin bul jaǵdaidyń jalǵyz derek emes ekeni belgili boldy. Qazirgi tańda kúdiktiniń áreketine bailanysty taǵy alty aryz tirkelgen. Barlyq jábirlenýshiler – zeinet jasyndaǵy azamattar.
«Keltirilgen shyǵynnyń jalpy kólemi eseptelip jatyr», – dedi Qaraǵandy oblystyq Politsiia departamenti bastyǵynyń birinshi orynbasary Qýanysh Orynbetov.
Atalǵan fakti boiynsha sotqa deiingi tergeý amaldary júrgizilýde. Politsiia azamattardy qarjylyq qujattarǵa muqiiat bolýǵa jáne kúmándi operatsiialar anyqtalǵan jaǵdaida dereý habarlaýǵa shaqyrady.
