Qaraǵandy qalasyndaǵy «Gorniak» bazarynda 33 jastaǵy er adam kóz jumdy. Úsh kún buryn tártip saqshylary osy jerden áieldiń máiitin tapqan bolatyn, dep habarlaidy "Ult aqparat".
Qazirgi ýaqytta osy eki jaǵdaidyń mán-jaiy anyqtalyp jatyr, sot-meditsinalyq saraptama júrgizilýde.
Áleýmettik jelilerdegi málimetke sáikes, 9 maýsym kúni «Gorniak» aialdamasynda ornalasqan dúkenge kireberiste er adam jazataiym oqiǵa saldarynan qaza tapty. Marqum qaladaǵy firmalardyń birinde ekspeditor bolyp qyzmet atqarǵan. Ol áleýmettik pavilonǵa taýar alyp kelgen. Kýágerlerdiń aitýynsha, dúkennen shyǵaberiste baspaldaq súienishine qoly tigen er adamdy toq soqqan. Alaida, Qaraǵandy ákimdigi bul faktini joqqa shyǵarady.
«Áleýmettik jelilerde Maiqudyq shaǵynaýdanynda elektr togynyń soǵýyna bailanysty jas jigittiń qaza bolǵany týraly aqparat taralýda. Qaraǵandy qalasy Politsiia basqarmasynyń málimetinshe, er adamnyń ólimi aldyn ala nusqa boiynsha, densaýlyq jaǵdaiynan bolǵan.
Atalǵan faktige sáikes, sot-meditsinalyq saraptama taǵaiyndaldy. Tergeý amaldary júrgizilýde.
Merziminen buryn qorytyndy jasamaýdy jáne tekserilmegen aqparatty taratpaýdy suraimyz. Saraptama qorytyndysy boiynsha sebep anyqtalady», - dep habarlady Qaraǵandy qalasy ákimdiginiń baspasóz qyzmetinen.
Oqiǵaǵa qatysty oblystyq Politsiia departamenti de túsinik berdi.
«9 maýsymda politsiiaǵa dúkenderdiń birinde er adamnyń máiiti tabylǵany týraly habarlama kelip tústi. Oqiǵa ornyna shyqqan kezde fakti rastaldy: saýda núktesiniń mańynda denesinde zorlyq-zombylyq belgileri joq 33 jastaǵy er adamnyń máiiti tabyldy. Bul fakti politsiiada tirkeldi. Sot-meditsinalyq saraptama taǵaiyndaldy, onyń nátijeleri boiynsha is júrgizý sheshimi qabyldanatyn bolady. Politsiia qyzmetkerleri oqiǵanyń mán-jaiyn anyqtap jatyr», - dedi Qaraǵandy oblysy PD baspasóz qyzmetinen.
Politsiia aqparatyna súiensek, dál osy jerde tórt kún buryn 36 jastaǵy áiel mert boldy. Onyń ólimine densaýlyq jaǵdaiy sebep bolǵany habarlanýda.
«6 maýsymda sol aýdanda denesinde zorlyq-zombylyq belgileri joq 36 jastaǵy áieldiń máiiti tabyldy. Sot-meditsinalyq saraptama onyń óliminiń sebebi júrek aýrýy – «keńeitilgen kardiomiopatiia« ekenin anyqtady», - dedi politsiiadan.
