Almaty.tv
25-mamyrdan bastap Qazaqstanda tirkeýden ótpegen smartfondar buǵattalady, dep habarlaidy Ult.kz Almaty.tv-ǵa silteme jasap.
El aýmaǵynda 3,7 millionǵa jýyq telefonnyń IMEI-kody qaitalanǵan, iaǵni zańsyz ákelingen qurylǵylar. Bailanys quraldary úsh sanat boiynsha tirkelmek. Birinshisi – aq tizim, iaǵni zańdy ákelingen, tirkelgen qurylǵylar. Sur tizimge engen qurylǵylar tek 30 kún ǵana jumys istei alady. Al qara tizimge IMEI-kody durys emes nemese qoldan jasalǵan telefondar kiredi. Mundai qurylǵylar birden buǵattalady.
Aita keteiik, ózgerister 25-mamyrdan keiin elge ákelingen telefondarǵa qatysty. Al qazir qoldanysta júrgen jáne derekqorǵa engizilgen qurylǵylar bul qatarǵa kirmeidi. Jaýapty organdardyń aitýynsha, bul shara zańsyz telefon ainalymyn azaitý úshin qolǵa alynyp otyr.
«Maqsat – elimizdiń tutynýshylaryn qaýipsiz, tekserilgen zaýyt óndirýshiden sertifikattalǵan qurylǵylarmen qamtamasyz etý. Ekinshiden, sur importtaýshylar kedendik jarna tólemei kúmándi qurylǵylardy naryqqa kirgizip jatyr. Mobildi qurylǵylardyń naryǵyn tazartý kerek», – dedi QR TsDIAÓM telekommýnikatsiialar komitetiniń basqarma basshysy Azamat Seriktaev.
Eger jeke tulǵa uialy telefondy shetelden óz qajettiligi úshin alyp kelse, qurylǵy aldymen sur tizimge engiziledi. Keiin uialy bailanys operatorlary paidalanýshyǵa SMS-habarlama jiberip, qurylǵyny verifikatsiiadan ótkizý qajettigin eskertetin kórinedi. Habarlamada arnaiy anketaǵa silteme beriledi, ony toltyrý qajet. Sonymen qatar shekaradan ótkenin nemese qurylǵyny alyp kelgenin rastaityn qujatty usyný da mindetti.
«Abonenttik qurylǵyny sur tizimnen shyǵarý úshin jeke tulǵanyń ózi tekserý protsedýrasynan ótedi. Eger smartfon shetelden ákelingen bolsa, onda arnaiy tirkeýden ótý qajet. Ol úshin, resmi saitqa kirip, portalda ETsQ arqyly abonenttik qurylǵynyń derekterin engizý kerek. Iaǵni telefonnyń IMEI-modeli. Osydan keiin sizdiń derekterińizdiń durystyǵyn tekserip, ony aq tizimge engizý bolady», – dedi QR TsDIAÓM telekommýnikatsiialar komiteti tóraǵasynyń orynbasary Oljas Qabenov.
