Qapshaǵai jaǵalaýyndaǵy týristerdiń kóptigi videoǵa túsip qaldy. Osy jaitqa bailanysty oblystyq sanitariialyq-epidemiologiialyq baqylaý basqarmasy halyqqa eskertý jasady, dep habarlaidy "Ult aqparat".
«Demalys kúnderi Qapshaǵai qalasynyń sý qoimasynda adam kóp jinalǵany baiqaldy. Jergilikti atqarýshy organ janyndaǵy monitoring toptary demalys úilerinde túsindirý jumysyn júrgizdi jáne aýrýdyń taralýyna jol bermeý, aldyn alý týraly eskertti», - delingen atalǵan vedomstvo taratqan habarlamada.
Sondai-aq mekemeniń baspasóz qyzmeti demalys oryndarynda karantin talaptary qalai saqtalýy tiis ekenin eske saldy.
«Qazaqstan Respýblikasy bas memlekettik sanitariia dárigeriniń 2020 jylǵy 25 jeltoqsandaǵy №67 qaýlysynyń negizinde 17-qosymshamen sanatorlyq-kýrorttyq maqsattaǵy obektilerge, demalys úilerine qoiylatyn shekteý is-sharalaryn, onyń ishinde karantindi engizý kezeńine talaptar bar.
Bul - COVID-19 boiynsha profilaktikalyq is-sharalar qatań saqtalýy, sondai-aq adamdar kóp jinalatyn jerlerde, qozǵalys qarqyndylyǵy baiqalatyn resepshn aldynda edenge belgiler qoiylady nemese shekteý tirekteri arqyly áleýmettik qashyqtyq aimaqtary aiqyndalady, budan basqa sanitariialyq-epidemiologiialyq talaptardy saqtaýǵa jaýapty adam taǵaiyndalady. Onyń mindetine temperatýrany ólsheý, personalǵa nusqama berý, jeke qorǵanys quraldaryn ýaqtyly aýystyrý, dezinfektsiialaý, jýý jáne antiseptikalyq quraldardyń qajetti qoryn qadaǵalaý, nusqama jýrnalyn júrgizý, maskalar, respiratorlar, jabdyqtardy óńdeý, úi-jailardy jinaý siiaqty talaptardy qatań saqtaý kiredi», - dep tolyqtyrdy atalǵan vedomstvonyń baspasóz qyzmeti.
